Australian Open hmeichhe singles champion lai Aryna Sabalenka in mipui nghahhlelh semi-final thlentir turin hnehna a chang a. Barbora Krejcikova lakah a thahrui ngah chu chakpui in Coco Gauff nen an inkhel dawn.
Thawhlehni ah Sabalenka hian 6-2 6-3 in a khingpui hi a hneh a. Nikum September a US Open final rematch a thleng dawn a, he inkhelah hian set a hloh hnuah Gauff hi tho lehin a champion zui ta a ni.
Belarusian player thangduang tak Sabalenka hian thla 12 kalta khan Rod Laver Arena-ah a singles Grand Slam title hmasa ber a lo la tawh a. Quarter-final inkhelah hian kum 2021 French Open champion Krejcikova service hi vawi ruk lai break sakin a lakah hian a vuak dik avanga point hmuh tum 20 a nei bawk.
Kum 25 mi hian tun tournament-ah hian set a la hloh lo a ni mai lova, match nga a khelh tawhah game 16 chauh la hlohin champion leh tura rinkai ber a ni mek.
Krejcikova hneh tur hian court chhungah minute 71 chiah hman a mamawh a, tun tum Australian Open a a la inkhelh rei ber tum a ni.
- Gauff a la kal zel
Sabalenka hma a ding tur kum 19 mi Gauff-i erawhin fiahna hautak a paltlang a. Marta Kostyuk lakah 7-6 (8-6) 6-7 (4-7) 6-2 in a chak hram.
American tleirawl hian Thawhlehni a inkhelah vuak dik loh tum 51 ngawt a nei a. Hnehna chang turin a tang tluan thei hram.
World number 37 Kostyuk hian amah aia rankings sang Gauff hneh theihna remchang nei mahse ani pawhin khelhthat a harsat a. An inkhel pumpui a point belhkhawm 246 zinga 107 chu tihsual atanga an khingpui zawkin an hmuh a ni.
“Ka khelh that ber a ni lo chiang a, khel pangngai pawh ka ni pha lo. Tennis tha ber ka khel lo tih ka chiang, chutihrualin hnehna ka chang a round dawt leh ka lut thei hi ka lawm hle. Ka khelhchhiat ka kalsan tawh a, ka theihna ang taka ka khelh thuai ka inbeisei.” tiin Gauff chuan a sawi.