Aizawl: Chief Minister Lalduhoma’n nimin khan a pisaah Mizoram State Sports Council, United Sports Association of Mizoram leh Mizoram Olympic Association hruaitute a kawm a. An mamawh a hnena an thlen te a ngaihthlaksak.
Chief Minister hian, Sports Minister fel tak an neih avangin an harsatna te hi ani’n tha takin a bawhzui theih tur thu a sawi a. Sports Minister kaltlanga engkim tih zel a duh thu leh, central scheme hmanga infiamna hmunhma siam belh theih chi a awm chuan chak taka bawhzui an tum thu a sawi.
Sports policy leh inrelbawlna dan tihdanglam deuh an duh te chu a tul ang zela hmalak theih a nih thu, chief minister hian a sawi a. MSSC leh MOA hmunhma tur an dil pawh, hmun remchang lo melha a hnena thlen leh turin a chah.
Sports hruaitute hian, Chief Minister lawmpui paha an dinhmun te hrilhhriat an duh vanga hmu an nih thu an sawi a. Sports Minister tha tak a pek avangin lawmthu an sawi.
Pawl pathum te hian chief minister hnenah Mizorama sports-in hma a sawn zelna tura pawimawh an tih thil pariat an thlen nghal a. An thil thlen zingah hian Sports department leh MSSC budget tihpun te, MSSC leh MOA puala building hran neih te, Mizoram State Games buatsaih leh te a tel a ni.