Aizawl: Mizoram Police Subordinate Officers’ Association (MPSOA) chuan Khankawn Police Check Gate-a duty officer anga insawi, sorkar tihmingchhe zawng leh police hmel tibal zawnga social mediaa thu thehdarhtu chu dan anga hremna pek ngei an duh.
MPSOA chuan thuchhuah siamin, January 12, 2024 zana Khankawn Police check gate-a duty officer anga in sawiin social mediaa thu a thehdarh chu an zirchiang tihte, khami zana duty officer irawm chhuak a nih loh thu chiang taka an hriat thute an sawi a, hetianga thu dik lo post-tu hi dan anga hremna pek ngei ni se an tih thute, MPSOA in dikna humhalh turin theihtawp a chhuah zel dawn a, smuggler-te leh mi huamhauh tlemte avang a Police hmai tihbalh a phal ngai dawn lo tih an sawi.
MPSOA hruaitute chuan nimin khan Home Minister K. Sapdanga chu a office hmuin, MPSOA nihphung leh service chungchanga an hmalakna hrang hrangte hrilhin, an hmachhawp hrang hrangah hma lakpui turin an ngen a. Dan loa sumdawnna chungchanga Chief Minister leh Home Minister hmalakna chu zaah za an thlawp thute an hrilh a, kum thar tir thla chanve pawh a ral hmaa ruihhlo heroin Rs. nuai 31 man hu leh kuhva rah bag 624 lai mai Mizoram hmun hrang hrangah police-ten an man thei chu lawmawm an tih thute an inkawmnaah hian an sawi chhuak a ni.
MPSOA chuan Mizoram Police-te chu thuruk vawn kawngah rinawm tur leh social media an hman danah pawh fimkhur leh zual turin MPSOA member zawng zawng a ngenin a chah nghal bawk a ni.