Aizawl : District Project Office, Samagra Shiksha, Saitual-in nimin khan Saitual Auditorium-ah District level career Mela a buatsaih a. Saitual Bawrhsap Dr Lalngura Tlau-in hmanpuiin, Saitual SP Pukhraj Kamal chu Resource person a ni thung.
Saitual District Level Career Mela – career guidance hi High School leh Higher Secondary school (Saitual block – Sawrkar school leh samagra) te tana buatsaih a ni a, School 16 atangin zirlai 178 an tel a, school tin atangin zirlai 10 leh zirtirtu 1 theuh an tel a ni.
He hun hmanpuitu Saitual Bawrhsap chuan an hun hman ang chu Saitual-ah an la hman ngai loh a nih thu sawiin, a buatsaihtute a fak a. Hlawk taka hmanga, ngaithlatu mai ni lova, a zawmtu ni theuh turin zirlaite chu a chah.
Zirlaite chu eng pawh ti dawn sela mahni inhriatchian phawt a tul thu hrilhin, Bawrhsap chuan hring- nunah hun laihawl ah an awm thu leh eng thiamna lam hawi nei nge an nih tih an inhriat chian a tul thu a sawi.
Dr Lalngura Tlau chuan zirlai kalkhawmte chu tuna an duhthlannain an hmalam hun tur thui tak a hril thu sawiin, hlawhtling tur chuan mal tlat ngam a tul thu leh hmalam hun atana rilru siamfel turin a chah bawk.