Australian Open hmeichhe singles champion lai Aryna Sabalenka chuan a champion trophy humhim thei turin hun a nei dawn a. Kumin final khel turin semi-final inkhelah Coco Gauff lakah hnehna a chang.
Ningani a semi-final inkhel hmuhnawmah seeded number two Sabalenka hian nikum US Open final a a tlawmna chu Gauff lakah hian a siamtha a. Inkhel boruak sangah set khatnaah player pahnihten tihsual an ngah.
Set hnihna erawh Sabalenka langsar zawk hle in 7-6 (7-2) 6-4 in a chak ta zawk a. Seeded number 12 Zheng Qinwen chu final ah a hmachhawn leh ang.
- Rinkai champion lai
Kum 25 mi Sabalenka leh kum 19 mi Gauff te inhmachhawn thei tur hi tournament tan hma atanga mi tam tak nghahhlelh a ni tawh a. Inelna khelh tan a nih hnuah rinlawk ang ngeiin an theihna sang avangin quarter-final lut turin an che tha dun thin hle.
Sabalenka hian a thahrui ngah a chhawr leh a, tun tumah tihsual han nei leh zeuh thin mahse tun tournament pumah set a la hloh loh avangin chak tura rin a hlawh.
“A che a rang dawn tih ka hria a, a ball vuak let a hlauhawm thin avangin ka inzir nasa hle. Zanin atan ka inbuatsaih that avangin hnehna ka chang.” tiin Sabalenka chuan a sawi.