Australian Open mipa singles inelnaah seeded number two Carlos Alcaraz chuan semi-final a lut zo lova, German star Alexander Zverev-a’n a lo kir leh hnua a khelhthat tluan tum a hman mek chu dang zo lovin a lakah a tlawm.
Nilaini khan Zverev leh Alcaraz te hi inkhelin seeded number 6 nihna changtu zawkin bul tan tha viau mahse set thumnaah Alcaraz hian na takin a nawr let a, a dinhmun siamthat turin a inkhel a huaisen.
Mahse Zverev a chesual duh lova, 6-1 6-3 6-7 (2-7) 6-4 in hnehna a chang ta zawk.
- Bul tan that a pawimawh
Alcaraz hian quarter-final a luhna turin a khingpuite a ngam thei viau a, hei vang hian tun tournament-ah pawh champion thei tura ngaih zingah a hming a ri ring.
Mahse last 8 inkhelah Zverev-a’n duhthusam a tha in bul a tan a, hei hian inrintawkna siam tak a siamsak bakah hnehna chang tura tang tluan thei turin thui takin a dinhmun a siam.
Set thumnaah Rod Laver Arena a tan hlawh Alcaraz-a’n set la turin theihtawp a chhuah a, set khat la mahse set li naah Zverev bawkin hnehna chang turin set a la leh zawk a ni.
“6-1 6-3 5-2 a hma hruai tawh chuan rilruah chetsual hlauhna a lian a, hei hi mihring rilruah chuan a loh theih loh a ni. Set li naah nawr let turin ka insiamrem a, a tawp thlenga ka khelhdanah ka lawm hle.” tiin a sawi.
Semi-final ah Hubert Hurkacz hnehtu Daniil Medvedev a hmachhawn leh dawn a. Inhliam avanga hun rei tak inkhel thei lo Zverev chuan, “Bul tan that leh vek ngai ka ni a, chuvangin top 10 a awm leh te, semi-final han khelh leh turte hi ka tan chuan thil lawmawm tak a ni.” a ti bawk.