Aizawl: Chief Minister Lalduhoma chuan a pisa-ah KVSSLV Prasada Rao, General Manager, Mizoram Regional Office, NABARD chu a kawm a. Mizoramah NABARD sum hmanga hmalakna a tam avanga lawmthu hrilhin, a kaihhruai sorkar chuan hmasawnna hnathawhna tura sum leh pai an dawn apiang dik taka an hman tur thu a sawi.
Chief minister hian eng sum hnar pawh ni se, hmasawnna hnathawhna tur an hmuh apiangte chu dik taka hman a nih a, a hun taka zawh a nih zel theih nan Project Monitoring Committee chak tak an din fel tawh tih chu Rao a hrilhin, “Heng hmasawnna hnathawhna kan dawn thinte hi a hluin a lawmawm em em a, dik takin kan hmang ngei tur a ni,” a ti.
NABARD-in kawng tam taka hnathawhna tur sum Mizoram sorkar an pek avangin lawmthu a sawi a ni.
NABARD general manager hian chief minister hi lawmpuina leh duhsakna a hlan a. An sum hmanga hnathawhte zawng zawng a hmunah an en vek thei lo tih sawiin, hna tling lo lutuk nia hriatte chu an hnenah hriattir zel se an duh tih a sawi a. Hna chhia chauh ni lovin hna tihkhawtlai pawh a awm thin nia an hriat thute chief minister hnenah hian an thlen a ni.