Chi leh hnam atanga thlirin Miss Japan atana thlan thar Carolina Shiino hi Japanes tam takin pawm harsa an ti a, social media-ah inhnialna nasa tak a chhuak mek.
Ukraine-a piang model hi Japnese tawng nal tak ni mah se, European hmel a pu tlat a, a hlawhtlinna hi Japan leilung fate’n an lawmpui lem lo.
Japanese mi leh sa ang chiah a pawm tura a ngenna leh mittui nena ram mipuite a sawmna kawngah pawh channa tha leh lawmawm a dawng vek lem lo bawk.
Kum 26 mi Carolina hi Ukraine-a piang ni mah se, kum 5 mi lek a nih laiin Nogoya, Japan-ah a insawn a, Japan rama seilian niin, hnam dang thisen kai zinga Miss Japan ni hmasa ber a ni.
Kum 10 hmalamah khan Japanese thlahpawlh Ariana Miyamoto chu Miss Japan-ah thlan a lo ni tawh a, 2015 kuma thil thleng kha Japanese Nu leh African America Pa atanga lo piang a nihna laia Ariana pawh khan zawhna a dawng hnem malh malh hle.
Carolina phei hi chu Japanese Nu leh pa pawh nei lo, Japanese thisen kai reng reng lo leh hmel landan thlenga Japanese hmehbelh tur pakhatmah nei lo a ni nghe nghe.
Social media lamah, “Japnese mix pawh a ni lo lehnghal a, Ukrainian (100%) hlang a nih vangin Miss Japan-a thlan chi a ni lo. A hmel tha tih kan pawm. Mahse, ‘Miss Japan’ a ni lo. Japanese a nihna khawiah nge,?” tih te chu an beihletna langsar a ni.
Mi pakhat chuan, “Japanese chanve ni tal se la chu kan la pawm thei. Mahse, Japanese a nihna 0% a nih laiin, Japan-a piang a la ni lo zui,” a ti ve bawk.