Australian Open bika match 33 chhung chak tluang mek Novak Djokovic chuan ngam loh a tawng ve ta nge nge a, nimin mipa singles semi-final match pakhat zawkah rinkai lo zawk ni chungin Jannik Sinner chuan Serb kal tluang lai hi a tihtawpsak a, Pathianni final-ah Russian third seed Daniil Medvedev leh German sixth seed Alexander Zverev inkhela chak zawk zawk a hmachhawn ang.
He thu buatsaih lai hian Rod Laver Arena lama Australian Open runner-up tum hnih ni tawh Medvedev leh Zverev inkhel result hi hriat hman a ni lo.
Kum 36 mi ni tawh Djokovic hi kum 2018 hnu lama Melbourne Park-a a tlawm vawikhatna niin, Italian fourth seed Sinner tan tun Grand Slam final a luh vawikhatna a ni thung.
Record a siam tawh belhchhaha title 11 lak zawn tlin tuma khelmual lut Djokovic hian kum 22 mi lek lakah a beisei loh result a hmu a, Margaret Court-ah Italian zawkin 6-1 6-2 6-7 (6-8) 6-3 hnehna changin, Serbian superstar hian major title 25 lak tlin a tumna Australia leilungah a puitlin zo ta rih lo phawt.
Semi-final pakhat zawka intum US Open champion Medvedev leh Grand Slam title la hlawhchhuak ve lo Zverev zinga a tu ve ve pawh tlang se Djokovic a tlak tawh miau avangin kumin hian Australian Open men’s singles trophy la dawng ngai lo kutah mipa title a lut dawn.
Tarlan tawh angin, Serb Djokovic kha kum ruk kalta daih tawh khan fourth round-ah South Korean Chung Hyeon hneh loin a tlawm a, khami hnu kha chuan Melbourne grand slam tournament-ah hian chak loh a nei zui leh ta lo ngar ngar a, a title kawl lai a humhim ngat ngat hnuah match 34 chhung chak zawn em chu a puitlin zo ta bik ngang lo a ni!
Italian zinga Melbourne singles final thleng hmasaber Sinner chuan inkhelh banah game hautak lutuk a nih thu sawi chungin top seed Djokovic-a rilru puthmang kha fuh tawk loa a hriat thu leh chumi hre ru kar chunga a nawr zui sauh sauh thu a sawi a, “Fourth set khelhpui kha ka tum ngat ngat phawt a, kan han khel ta ngei a, bul ka tan fuh em em a ni,” a ti.
Break point vawikhat pawh hmachhawn lo Sinner hi khati taka Djokovic tana game a harsat chhan an zawt a, nui chungin, “Ka hre nang, amah zawt rawh u,” tiin a chhang.
Melbourne Park-a a chak leh tak avangin Sinner hian Djokovic hi ATP Finals, Davis Cup leh Grand Slam stage-ah a hneh ta vek a ni!