India ram Danpui hman tan ni, Republic Day vawi 74-na chu India ram hmun dangte rualin Mizoram hmun hrang hrangah lawm a ni.
Zirtawpni zing dar 8 khan Mizorama Republic Day hmanna inkhawm lian ber Aizawl Sipai Lammuala neihah Mizoram Larsap Dr Hari Babu Kambhampati chuan hnam puanzar pawt pharhin parade contingent 27-te lam a endik a, hnam puanzar chibai an buk chhang letin, Zoram mipui zawng zawngte duhsakna chibai a buk bawk a ni.
Larsap Dr Kambhampati chuan January 26, 1950-a ram danpui (Constitution) a inpek atang khan India ram chu mipui thlante rorelna ram lian ber a ni ta a. He ram danpui hi khua leh tui zawng zawng tan dikna, zalenna leh intluk tlanna humsak tlat tura duan a nih thu leh, a pawimawh em avangin ram pumah a lawmna hun hman thin a nih thu a sawi.
Tun hnaiah inthlanpui muanawm, felfai leh entawn tlak taka kalpui a nih avangin Mizoram mipui zawng zawng chungah lawm thu a sawi a. Sorkar hna thawkte leh dan leh thupek kengkawhtute bakah, tlawmngai pawl hrang hrangte, kohhran leh a bik takin Mizoram People’s Forum (MPF) ten inthlanna felfai tak nei tura theihtawp an chhuah avangin lawmthu a sawi bawk.
Hmasawn tur chuan remna leh muanna a pawimawh tih sawiin larsap chuan, “Remna leh muanna venhim hna thawktu police leh dan kengkawhtu hrang hrangte hmalakna mai bakah, NGO te, kohhran te, thuthar thehdarhtute leh mipui thahnemngaihna avangin India rama state muanawm ber kan la ni chhunzawm hi a lawmawm hle a ni,” a ti.
Mizoram Larsap chuan sorkarin a ngaih pawimawh tur, khawtlang mamawh bulpui atana zau taka hma a lakna tur sawiin, sorkar inrelbawlna tha siam te, kil tina hmasawnna ngelnghet leh tlo siam te, thil siamna lam (industry) puihbawmna pek leh ‘Bâna Kaih’ te, khawtlang himna (social security) te, hriselna leh eibara vantlang himna leh thlei bik awm lova hma lak te, thalaite hmakhua ngaihtuah a nih tur thu te, environment humhalh te, thil tum hun rei zawk mamawh siam a hmasawnna lian tham thlen a nih tur thu leh mahni thil thar chhuah leh siam chhuaha innghat economy nei tur a hma lak tum a nih tur thute a sawi.
Dr Kambhampati chuan sorkarin state sumpai dinhmun sawh nghet a, tihmasawn turin hma lak a tum a tih a sawi a. Sorkar sum hmuh leh hman ral inbuk tawk leh sum enkawl dan felfai tak te, inrenchem, hmasawnna kaihhnawih lova sum hman tihtlem leh hmanraw hrang hrang enkawl leh hman dan tha leh felfai zawkte kalpui tum a nih tur thu te a sawi bawk.
Ram sumpai dinhmun sawh nghet turin insingsak nan hun eng emaw chen chu sorkarin a mamawh ngei dawn nia sawiin larsap chuan, “Hemi kawngah hian sorkar hmasa hmalaknate pawh chhunzawm awm te chu a chhunzawm zel dawn a. Ruihhlo hman sual dona leh ruihhlo ngaite enkawlna lamah pawh nasa zawk leh chak zawkin hma lak a ni ang,” a ti.
Republic Day vawi 74-na lawmnaah hian kumina Police Officer leh Police hnathawktha chawimawina dawngtute hnenah chawimawina tangkapui Larsap Dr Hari babu Kambhampati chuan a hlan a. Mizoram atangin pa chhuanawm, mipui vantlang rawngbawlna atana a hun puma in pe, TNT hotupa Sangthankima chu Padma Shree 2024 chawimawina dawng tura thlan a nih thu puan a ni bawk.
Kumin Republic Day parade-ah hian contingent 27 an awmin, armed leh unarmed contingent paruk ve ve, school contingent 12 leh band party pathum an ni. Parade commander hi Jessica Lallawmzuali, Dy. SP (Probation) a ni a; 2nd Commander hi Malsawmkima, Dy. SP (Probation) a ni thung.
Larsap chuan parade contingent zinga lam thiam zual thlanchhuahte hnenah lawmman a hlan bawk.
Zirtawpnia Lammuala Republic Day lawmna inkhawm neih zawhah larsap chuan kum danga a tih thin angin, sawm bik mi pawimawhte Raj Bhavan-ah thingpui a inpui a ni.