Aizawl: Member of Parliament (MP) inthlan lo awm tur atana inbuatsaihnate leh roll awm dan te enfiahin Inrinni khan Chief Electoral Officer Madhup Vyas chuan Saitual tlawhin, Saitual District Election Officer Dr Lalngura Tlau leh Election official-te nen Saitual DC Conference Room-ah an inkawm.
CEO hova an inkawmnaah hian MP Inthlan lo awm tur atan kawng hrang hrang an sawi ho a. Chu’ng zingah chuan EO, ERO leh AERO te indaihlohna te, venhimna chungchangte, MLA general election a vote tla aia hniamlo tura tan lak te a tel a. Vote tlak that lohna area-ah 5% tala vote tla tisang tura SVEEP hmanga tan lak chungchang te pawh an sawiho a ni.
An inkawmnaah hian Madhup Vyas chuan MLA Election neih zawh takah Saitual chuan district a nih anga a vawikhat a hmachhawnna ni mah se, felfai takin inthlan an buatsaih thei chu election official te leh thawktute inpekna vang a nih thu sawiin, lawmthu a sawi a. MP inthlan lo awm turah pawh theihtawpa tan la a, a bik takin vote tlak tlemna leh critical polling station area bik te vote tla average a pun theih nan hmalakna neih a tulzia a sawi a, SVEEP leh hmanraw hrang hrang hmanga theihtawp chhuah turin a chah.
CEO hi Amol Srivastava, IAS -in tawiawm a. Dr Lalngura Tlau, Saitual DC; Ladinfeli, Election Officer; Lalramliana SDO(C) Ngopa; VL Chaka Hmar, AERO; Lalruatpuii, BDO (Phullen) te bakah Saitual SP Pukhraj Kamal te an tel bawk.