Aizawl : Mizo Zirlai Pawl (MZP) General Headquarters, Aizawl chuan nimin khan Chief Minister Lalduhoma chu a pisa-ah kawmin, Free Movement Regime (FMR), Border Fencing leh NIT Mizoram chungchangte an sawipui.
MZP hruaitute chuan FMR thiah tumna leh Border fencing hung tumna awm hi theihtawp chhuah a dodal tlat an tum thu leh a tawp thlenga an hmalakna thlawp zel turin chief minister an ngen. CM Lalduhoma chuan, Prime Minister leh Union Home Minister te hnenah FMR thiah tumna leh Border fencing hung tumna awm chu a duh loh thu a thlen tawh thu MZP hruaitute a lo hrilh.
NIT Mizoram chungchang CM chuan, a rang thei ang bera hmalak a tum thu leh NIT Chairman nen pawh an inbiak tawh thu MZP hruaitute hnenah hian a sawi.
Nimin vek khan MZP hruaitute chuan, Commerce & Industries Deptt. leh Aizawl Smart City Ltd. hnuaia chhungkaw sang chuang eizawn theihna tur Bazarpui Building sak mek te an enfiah a. Hnathawh muang lutuk bakah hna zawh hun tura hun ruat, kumin January leh June thla chhunga zawh a nih loh tur chhan hrang hrang te endik a ni.
MZP hruaitute chuan bazar building sak mek hi tun aia chak zawka thawk tur leh, mipuiin a rang lama an hman theih tura hawn a nih theih nana hna thawk turin hnathawktute an hriattir a. Sorkar thuneitute pawh hnahthawktute bill a rang lama tihchhuah sak thin turin a ngen nghal bawk.