Aizawl : Excise & Narcotics Department (E&ND) chuan ni hnih chhungin hmun hrang hrangah ruihhlo thahnem tak an man.
Thawhtanni tlai dar 4:23 khan E&ND hian New Vervek bawlhhlawh paihna bulah ganja kgs. 186 leh a neitua mi pahnih – Felix Malsawmdawngliana (20), Mual veng, Senvon, Manipur leh Hmingthanglien (34), Rengkai, Muanhlum, Manipur-a khawsa nia inchhalte chu an man. Ganja phurhna atana an hman TATA YODHA (Regn No – MZ01X-6743) pawh hrensak nghal an ni.
Hemi zan vek, dar 6:15 khan Pukpui, Lunglei-ah heroin grams 122.870 (hawng 10) leh a neitu nia puh mi pahnih Immanuel Lalrinchhana (34) leh C.Lalramnunmawii (35), ITI Veng, Aizawl-a khawsa ve ve nia inchhalte chu an man. An pahnih hian nupa an ni. Heroin phurhna atana an hman Magnite Car (Regn No – MZ-01Z-5699) pawh hrensak nghal an ni.
Excise & Narcotics Department leh Central YMA Kumpuan Committee thawkdun chuan nimin zing dar 7 khan Khatla-ah heroin kgs. 1 & 620 (hawng 95) an man.
Ruihhlo vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni a, Court-ah hruai nghal an ni.