Season thar a Europe huap inelna a tel phak ngei tum Getafe in an tlarhma a player rinrawlte pahnih goal khung hmangin hnehna an chang a. Granada lakah 2-0 in an chak.
Estadio Coliseum a Thawhtanni zana inkhelah Manchester United atanga loan a an hawh Mason Greenwood chuan minute 20-naah Getafe hmahruaina goal a khung a. Dinglam atang ball tlanpuiin penalty area hmawrah defender ten hual hneh viau mahse goalkeeper Augusto Batalla a ‘chip’ a, goal tha bik a khung.
Minute 15 hnuah Spanish striker Borja Mayoral chuan an goal hnihna a khung a. Tun season-ah league-ah goal 14 a khungna niin Jude Bellingham leh Artem Dovbyk te nen top scorer an ni mek.
An chak chungin Getafe head coach Jose Bordalas chuan Greenwood chuan hma a la sawn thei tih a sawi a, “First half a kheltha a, second half-ah erawh a tlahniam. Kan tlarhmate khelhdanah kan lungawi vek, amaherawhchu an zavaia thawhrimna avangin an langsar a ni. Team tana kan tanrual a, a tawp thlenga kan tan hi a pawimawh.” tiin a sawi.