National Statistical Commission member pahnih chu Thawhtanni khan an bang a, he thil hi Congress chuan rorel lai beih nan an hmang nasa hle a, “Modi-a sorkar chuan institution pakhat a tihlum leh ta,” tiin an sawi.
Congress hian National Statistical Commission member pahnih an bang leh takah chuan ram chhunga institution pawimawh ber pakhat chu sorkar inlulin lutuk tuar lovin a thi niin an sawi a ni.
Congress hruaitu hlun len finance minister hlui, P.Chidambaram chuan an party-in National Statistical Commission chuan an sun tih sawiin GDP leh employment data dik tak, khawih danglam loh chu tichhuak ngei turin sorkar an phut tih a sawi.
A thawhpui, Ahmed Patel pawhin hetianga banna hian sorkarin sorkar a kalpui dan dik loh tar lanna data leh statistics tihbo vek a tumna a nih thu a sawi a. Congress thupuangtu, Abhishek Singhvi pawhin na takin BJP kaihhruai sorkar chu a bei bawk.
National Statistical Commission hi an member pahnih, P.C.Mohanan leh J.V.Meenakshi te chuan Thawhtanni khan sorkar nen an inrem loh avangin banna an thehlut a. Mohanan phei hi chu commission chairperson nihna lo chelh lailawk tawh a ni.
Chidambaram chuan Twitter-ah, “Institution pawimawh tak pakhat chu January 29, 2019 khan sorkar inlulin lutuk avangin a thi leh ta,” a ti a. National Statistical Commission thi an sun thu leh NSC chu a pian nawn leh hma zawng hahdama chawl turin a thlah bawk.
Congress thupuangtu Sanghvi chuan NSC chu Modi-a kaihhruai BJP hnuaia RBI, CBI, CVC, CBDT, ED, IT te a chhia ang bawkin a chhe leh ta tih a sawi ve bawk.