New York Knicks in National Basketball Association a team tha zinga chhiar tel theih nei turin hmalam an pan tih an lantir a. NBA Playoffs a tawhkhirh pawl an ni thei dawn tih an lantirna kawngah kumina bul an tan duhawm chu an chhunzawm.
Knicks hian Nilaini zingah Utah Jazz chu 118-103 in an hneh a, a zawna vawi riat an chakna chiah a ni.
Madison Square Garden a inkhelah Donte DiVincenzo chuan Knicks tan point 33 a score a, three points vawi kua lutin a team tan hma a hruai. Jalen Brunson chuan point 29 leh assist vawi kua a nei ve bawk.
Knicks hian an team chanchin a thla duhawm ber zing ami January-ah an hmang a. Vawi 16 inkhelin vawi 14 an chak.
Kum 1994 March-ah vawi 14 khelh atanga an chak vek leh kum 1968 December a vawi 18 khelh atanga vawi 15 an chak chiah an pha lo.
Star player Brunson chuan, “Hetiang hi kan ni thei a ni tih hi ka sawilawk tawh a, tam takin an awih lovang a, mahse dawt ka sawi lo. Sawilawk theih lovah kan ngai a, mahse ka mit atanga chiang tak mai chu hmasawn turin nitin kan bei ngat ngat dawn a, hei hi hun rei tak atanga kan kaldan a ni a, chuvangin ka sawilawk ngam a ni.” tiin a sawi.