Mizorama Lalduhawma kaihhruai ZPM sawrkar thar lo piang hian ruihhlo laka hma lak an tum nasa viau niin a lang a. Excise minister Lalnghinglova Hmar chuan mawhphurhna a lak veleh ruihhlo lokalna kawng ber Zokhawthar leh a chhehvel a fang hmasa ber a. Ruihhlo tawlhruk chanchin a zir uluk hle niin puan a ni a. Minister hian ruihhlo do chu a hma lakna hmasa leh ngaihpawimawh berah a neih dawn tih a tarlang a. Kan ram thalaite eichhetu leh thihna tam tak thlentu a han hmachhawn chat mai hi a lawmawm hle mai. Nitina chhungkaw tam tak lungngaihna thlentu hi pawl hrang hrangte pawhin an lo veiin an lo do nasa tawh a. Sawrkar ngei pawhin tan la in a man pawh an man tam thei hle. Tunhma nuai tel man an man pawh tunhnaiah chuan vaibelchhe tel man zelina ni ta hial.
Amaherawh chu ruihhlo hian kan ram a chiah hneh tawh khawp a. Kan ram chauh harsatna a ni lova. Khawvel pum buaipui a ni a. Tih rem hi thil awlai lo leh mi tam tak phei chuan tum en pawha an en tawh loh a ni hial a ni. Tunhma zawnga ruihhlo dotute khan an do tak tak lo a ni lo a. An theihtawp an chhuah vek a. Mahse, khawvel pawhin a beih nasat em em chunga hluar chho zel a ni zawk. Excise minister hmalakna tur hi a ko a sang viau dawn a. Kan ram mipui hian tih takzeta kan thlawp a mamawh dawn.
Mizoram kil tin maiah hian ruihhlo bawia tang hi kan tam em em a. Kan ram a sawpchhiat dan hi sawithiam hleihtheih pawh a ni meuh lo. Kohhran hrang hrangin pulpit tlang atangin an bei a. A ngawlveite an luhchilh a. YMA in a do kum pawh an puang rei tawh. Veng tinin namenlo in ruihhlo donaah hna kan thawk a. Mahse, kan beisei angin a sawt si lo.
Ruihhlo dona kawngah hian kan ram hian hma kan la la fuh lo deuh em ni aw tih hi thlir let a hun khawp mai. Kan hmalakna a sawt lo nia kan hriat chuan kawng dang deuh zawn tum ta ila. Ruihhlo that lohna hi naupang zirlaibu atanga intana kan beih a ngai niin a lang. Bible changthlan neia in sawi khum leh ringawt thin lo a, naupang tê an nih lai atanga a tena an ten dan tur hi an thinlunga tuh kan tum a ngai. Ruihhlo do a ngaihdan tam tak awm thin karah naupang atanga tan hi a fuh ber zel a rinawm. Chutih rualin a ngawlvei sa te enkawlna pawh thlahthlam chuang lo bawk ila.