School Education Minister Dr Vanlalthlana’n tun hnaia Samagra Shiksha hnuaia thawk tur an lak thar tur chu fair takin an kalpui dawn a, minister leh ZPM-in list an nei dawn lo tih a sawi.
Nimina a pisaa chanchinbu mite a kawmnaah education minister chuan Samagra shiksha hnuai thawk mi 161 an la dawn a, hna lak dan kalphung an tih danglam tur thu sawiin, written exam tihtel a ni ang a, hna diltute chu demo teaching tihtir an ni dawn tih a sawi.
Education minister chuan zirtirtu hna lak turah minister-in list a nei dawn lo a, ZPM pawhin list an nei dawn lo tih a sawi a, official-te pawh ven an ni dawn tih leh interview board-ah official-te bakah observer an thut teltir dawn tih a sawi a, “Official-ten mark an pek san viau a, observer-in mark a pek hniam chuan interview neih that leh a ni ang,” a ti.
Dr Mathlana chuan ZPM-in an lo intiam tawh angin hna lak chu fair takin an kalpui dawn a, hetianga an tih chuan thalai hna zawngten ngaihngam takin hna an dil ngam tawh ang a, a tling zo lote pawhin fair takin an tling lo tih an inpawm thei dawn tih a sawi.
Zawhna chhangin education minister chuan Serhmun khuaa school awm tawh lo chei thatna tura sum pek chhuah awm nia sawi chungchang a sawifiah a, UDISE report atangin Serhmun school-a toilet siamna tur hi ruahman a ni tih te, hetihlai hian sikul chu a la awm a, sum sanction a nih tawh hnuah erawh a awm ta lo tih a sawi a, order a chhuah rualin sikul hi a awm tawh lo tih chu official lamin hre chhuak nghalin he sum hi sikul danga hman turin ruahmanna an siam nghal tih a sawi a; sikul awm tawh lo atan sum hman a awm lo tih chu mipuiin hria se an duh thu a sawi.
Education minister Dr Mathlana chuan SEDP hnuaia thawk zingah ai kal la an awm tih hriat a nih thu sawiin, an hnathawhna hmuna awm tha duh lote chu hlawh an pe dawn lo a, ai kala an chhawr, hna thawk tak tak zawkte chu an bank account-ah kut hah man thunsak an ni dawn tih a sawi.
Education department hmalakna tur hrang hrang sawi bawkin, Mizoram Education Reforms Committee din an tum thu te, zirna kawng hrang hranga thurawn lakna tur leh Mizoram zirna kal phung zir bingna leh ruahmanna buaipui turin education consultant ruat tum a nih thu te, HSLC-a tithate UPSC exam hmachhawn tumte chu an inbuatsaihna turin kaihhruai an ni dawn tih te, school syllabus leh question pattern ennawna siam that an tum thu te, education Department hnuaia teaching leh non-teaching staff ai kal late list chu DP&AR hnenah theh luh a ni tawh tihte leh Mizoram Education Act leh rules/regulations dang ennawn a ni dawn tihte a sawi bawk a ni.