Aizawl: Aizawl City College Joint Students’ Union (ACCJSU) chuan dan loa Myanmar atanga Mizoram lutte kut tuar Mizo thi an awm leh chuan an rama thawn haw vek turin sorkar laipuiah hma an la dawn tih an sawi a, raltlante chu khuahkhirh turin state sorkar an ngen.
ACCJSU hruaitute chuan nimin khan Aizawl Press Club-ah chanchinbu mite an kawm a, tun hnaia dan loa Mizoram tlan lutte kut tuara thihna thleng chu pawi an tih thu leh tun hnuah chuan Myanmar mite kutah Mizo pakhat pawh an thi tawh tur a nih loh thu sawiin, pawikhawihna rapthlak tak an thlen tir leh chuan an rama thawn let vek turin sorkar laipuiaah hma an la dawn tih an sawi.
Sorkar laipuiin Mizorama awm Myanmar raltlante ‘biometric’ data lak sak tura a tih chu bawhzuia hma la tur leh a rang thei ang bera raltlante chu khuahkhirh turin sorkar an ngen thu sawiin, Aizawl DC-in Myanmar raltlante kaihhruaina tur inkaihhruaina a siam dan 11 chu khauh leh zuala kengkawng turin sorkar an ngen tih an sawi.
ACCJSU hruaitute chuan hnam bil puala pawl din tam lutuk chu tha lo an tih thu leh zirlaite hmasawnna tur kawng tam takin a dal tih an sawi a, hnam bil puala zirlai pawl dina hruaitute chu zirlai pawh ni tawh lo, sorkar nawr nana pawl hmang tangkaite an awm thin tih leh chutiang chu tha lo an tih thu an sawi a, Mizo mipuite pawh hnam bil puala pawl dingte sponsorship pe lo turin an sawm.
Sorkar enkawl college-a proffessor indaihlohna nasa lutuk chu zirlai ten an tuar tih sawiin, college-a zirtirtu a chanve deuh tho chu college pawisaa chhawr leh contract-a thawkte an ni tihte, chung a nghet loa thawkte chu thalai in-fit tak takte an ni tih leh an thiamna ten a tlin chuan a ngheta lak theih nise an duh tih an sawi bawk a ni.