Aizawl : National Highway-54 laih zauh leh siamthat hna thawh mekah, Serchhip District chhunga zangnadawmna la tawh, mahni in la thiat lo te chu nimin khan Executive Magistrate te kaihhruaina hnuaiah endik niin chenna in, in sak lai, green house leh sorkar ram lak china bungraw chhawpchhuah te an thianfai.
Serchhip DC David Lalthantluanga, Competent Authority for Land Acquisition (CALA) hova January 29, 2024 (Thawhtanni)-a an lo rel tawh bawhzuiin, Executive Magistrate pali HD Lalpekmawia, Gaston Vanlalhriatpuia, Daniel Sailo leh Lalhruailiana Zote te kaihhruaiin Khumtung, Chhingchhip, Chhiahtlang leh Baktawng khuaah Eviction Team te hi an chhuak a. Zangnadawmna sum a pumhlum a la tawh si, in la thiat duh lo mi tlem te chu District Administration chuan an chungah khawng taka hma la in, an in hmun lo ram te dan anga thiatin an senghawi sak ta a ni.
NH-54 kawngpui laih mekah Serchhip district huam chhunga sorkarin ram a lak fel tawh, dan anga zangnadawmna – compensation leh Rehabilitation and Resettlement sum leh pai dawng tawh te zingah in leh lo thiat duh lo lui te hi July 2023 leh August 2023 khan Magistrate ten an inah ngei kal chilhin an in te thiat tura thupek (eviction notice) pek an nih bakah, November 22, 2023 khan Serchhip DC David Lalthantluanga, CALA chuan a hmunah tlawhin, an thiah loh chhan te a endik bawk a. Eviction Drive thawhkhatna hi November 28, 2023 khan neih niin, in pakhat thiah a lo ni tawh bawk.
Heng khaw li (4) ah te hian chhungkaw eng emaw zat chuan an in hi an thiah mek avangin, thiah sak ngai lova lo thiat chhunzawm zel tura hriattir nghal an ni a. Hetihlai hian, la thiat ve lo in eng emaw zat chu sorkarin ram a lak tawh, Right of Way (ROW) chinah chhinchhiahin, khawl hmangin thiah sak an ni.
Nilainia in thiahna ah hian Serchhip atangin Police thahnem tak kalin, kawngpui enkawltu NHIDCL leh Contractor te bakah khawtlang hruaitute an tel bawk a, buaina leh harsatna awm lova hmalak niin, IPC Section 188 hmangin thubuai siamsak an ni dawn a. District thuneitute chuan zangnadawmna la tawh, mahni in ta thiat lo te chungah dan angin hma lak chhunzawm zel an tum a ni.