Australia nipui khaw lum chu a rapthlak hle a, January thla chu an ram chanchina a lum ber thla a ni a, chawhrualin 30°C zet a ni.
Bureau of Meteorology chuan tun nipuia khaw lum lutuk chu an lo rin phak bak a nih thu a sawi a. January thla chhunga ni nga chu an rama khaw lum ber ber ni ni 10 zinga ni 5 a ni phak a. A chang chuan 40°C lai a ni phak thin.
Khaw lum lutuk hian ram sa a tithi nasa hle a, ram a kang nasa a, damdawi ina lut pawh an tam hle a. Ram sakawr pawh 90 chuang an thi a ni.
January thla khaw lum hian chhiatna a thlen nasat dan chu kum 2013-a khaw lum avanga chhiatna thleng record a khum hial a ni.
Climatologist Dr. Andrew Watkins chuan, “January thla chung khan ram pum hi khaw lum uchuak takin a tuam chhuak vek a ni,” tiin a sawi a. Ruah sur a tlem em em thla a ni bawk a, kum dang January zawng aiin kumin January thlaa ruah sur hi a tlem zawk a ni.
Khaw lum hi tui lama chengte pawhin an tuar a, New South Wales-ah sangha maktaduai tel an thi a ni.
Australia hi kum tin nipuia khaw lum lam hi a sang deuh deuh zel a, nikum khan Sydney-ah chuan 47.3°C zet a ni a, hei hi kum 1939-a record lo awm tawh a khum a ni.
“Australia-a khaw lum lam hi kum 100 kal ta aiin 1°C velin a lum tawh a, a kum telin a lum hret hret zel a ni,” tiin Dr. Watkins chuan a sawi.