Nilai zana EPL khelhah champion lai Manchester City chuan an mikhual Burnley chu 3-1 in an hneh a, Arsenal lehlpelin pahnihnaah an kir leh. Burnley lakah hian Julian Alvarez chuan a piancham lawm nan goal hnih a thun. Nilai zana inkhel dangah Tottenham Hotspurs chuan 3-2 in Brentford an hneh a, top 4 huang an luah let ve leh bawk.
Champion lai Manchester City hian Etihad Stadium-a an mikhual Burnley lakah an khel tha viau a, minute 46 chhung lekin goal thum an thun hman. Inkhel tan atanga minute 16-naah Julian Alvarez chuan a piancham vawi 24-na lawm nan hmahraina goal a thun. Argentina forward Alvarez hian minute 22-naah Kevin de Bruyne siamsak atangin an goal hnihna a thun zui leh a. Alvarez goal thun hmang hian si hnih faia hmahruai chungin chawlhlawk an hmang.
Chawlhlawk hnu lamah City an khel tha leh zual a, goal an thun leh thuai. Second half tan atanga minute khatna lekah Rodri chuan Phil Foden siamsak atangin an goal thumna a thun a, an hmahruaina a tizau leh zual. Si thum faia hma an hruai hnuin City an khel tha zui viau na a, goal erawh an thun belh thei bik lo. City in goal an thun belh theih loh laiin Burnley chuan an mualpho lutuk tur khuh mawi nan hun tawp dawn hnaihah goal an thun. Burnley tan hian Ameen Al Dakhil chuan minute 90’+3-ah an goal neih chhun a thun a, City laka tlawm erawh an pumpelh thei ta lo thung.
Burnley laka point thum hlawhchhuak City hian khelh 21 atangin point 46 an hmu a, pahnihnaah an awm mek. City hian hmahruaitu Liverpool chu point ngain an la phak lo va, Reds ai hian vawi khatin an khel tlem zawk thung.
- Spurs in Villa an lehpel
Nilai zana inkhel dangah Tottenham Hotspurs chuan an mikhual Brentford chu 3-1 in an hneh a, Aston Villa lehpelin top 4 huangah an inhlangkai.
Brentford hian Tottenham lakah bul an tan tha viau a, minute 15-na lekah Neal Maupay chuan hmahruaina goal a thun a. Club tana rintawm Ivan Toney pawhin minute 67-naah an goal hnihna a thun ve bawk. Bul tan tha viau mah se Tottenham er let an tuar lov a, tlawm zawkah an tang. Spurs tan hian Destiny Udogie, Brennan Johnson leh Richarlison ten goal an thun a, an mikhualte lehthalin point thum hlu tak an hmu.
Season thara bul tan tha Tottenham hian khelh 22 atangin point 43 an hmu a. Top 4 huang an chhuahsan vang vang hnuin palinaah an kir leh. An lehpelh tak Aston Villa nen an point hmuh a intluk mek a, an dinhmun erawh a derthawng reng thung.