United States khawthlang lam lailia khawvawt vin tak, Polar Vortex an tih mai thleng meka nunna chan chu mi 21 an tling tawh.
US-a cheng hmun thuma thenkha hmun khat vel, mi mtd 90 vel chu -17°C hnuai lamah an awm mek a, mi mtd 250 velin khawvawt hi an tuar a ni.
Damdawi inte pawh khaw vawt lutuk avanga buai enkawlin an buai hle a. Vawiin lamah erawh tlemin boruak vawt hi ziaawm deuh tura beisei a ni.
Khaw vawt tuar nasa ber hi chenna innei lote an ni hlawm a, khawpui hrang hrangah an tawm lumna hmun tur buatsaih a ni a. Heti chung hian kum 60-a upa pitar chu Lorain, Ohio-a a inah thia chhar a ni a. Mi thenkhat, an in bul lawka chhuak ni awma ngaih theih ruang chhar pawh an awm nual.
Khaw chin zirtute chuan vawiin (an ram sanaa Zirtawpni) lamah chuan khaw vawt zualpui hi reh tan turah an ngai a. Karleh lamah hi chuan Chicago khawpui velah chuan 10°C vel ni tawh turah an ngai.
Tun tum khaw vawt hian khawthlang lam lailia khaw vawt record thar 30 zet a siam a. Cotton, Minnesota chu a vawt ber niin Ningani khan -48°C zet a ni.
Chicago khawpui pawhin a vawh ber tum chu Ningani vek khan a tawng bawk.
Tun tum khaw vawt lutuk hi sumdawnna lamah pawh ramin a tuar hle dawn tih a hriat a. Kum 2014-a hetiang deuh bawka chet theih loh khawpa khaw vawt vang hian ramin sum a hloh chu $ tld 5 zet a tling niin an sawi.
Khaw vawt leh vur tam lutuk avangin thlawhna 2,300 chu zin tur thulhtir niin 3,500 chu an thlawh hun sawn a ni bawk.
Canada-ah pawh Prairies, Quebec leh Ontario te bakah Alberta leh Nova Scotia-ah vur a tla nasa hle.