January 31, Nilai zana English Premier League khelhah hmahruaitu Liverpool chuan Anfield-a an mikhual Chelsea chu 4-1 in an hneh a, an hmahruaina an tizau.Liverpool hian season kal meka beisei phak lo Chelsea an ngam viau a, chawlhlawk hma leh chawlhlawk hnu lamah goal hnih ve ve an thun. An hmahruaina tizau tura chak mamawh Reds hian an mikhual Blues an ngam hle a, minute 23-na lekah Diogo Jota chuan Conor Bradley siamsak atangin hmahruaina goal a thun. Jota goal thun hnuin Jurgen Klopp-a team te an khel tha chhunzawm a, minute 39-naah goal hmahruai siamchhuaktu Bradley chuan Reds tan a goal hmasa ber a thun. Chelsea an hmachhawn hi Bradley tan hun chhinchhiahtlak a tling a, Liverpool tan EPL-a goal a thun hmasak ber a nih bakah assist vawi hnih ngawt a nei bawk.
Chawlhlawk hnu lamah Liverpool an khel tha chhunzawm a, Chelsea in an chai hleithei meuh lo a ni ber mai. Reds tan hian Dominik Szoboszlai chuan minute 65-naah Bradley siamsak atangin an goal thumna a thun a, an hmahruaina a tizau. Si thum fai ngawtin hmahruai tawh mah se Reds in duhtawk an la ngah lova, sen lar zawka inlan tumin tan an khawh chhunzawm zel.
Liverpool in goal tam zawk thun tuma tan an khawh laiin Chelsea in goal khat an thun ve zauh. Christopher Nkunku chuan Chukwuemeka siamsak atangin minute 71-naah goal thunin an si phurh a sut then. Nkunku goal thun hian Liverpool a chhaihkawlh a, goal hmangin an mikhualte an chhanglet leh nghal thuai. Minute 79-naah Luis Diaz chuan Darwin Nunez siamsak atangin an goal lina a thun a, a tawp a khar ta a ni.
Chelsea laka hnehna lian chang Liverpool hian point ngain an hmahruaina an tizau nawn leh a, an mahni hnaih zualtu Manchester City leh Arsenal an kalsan fal rih. Liverpool laka tlawm Chelsea hian table laihawl an chhuahsan hleithei meuh lo va, khelh 21 atanga point 32 hmuin 10-naah an awm chhunzawm.