Aizawl: Nimin khan Mizoram Horticulture Service Association chuan General Conference an hmang a. He huna khuallian Horticulture Minister Prof Lalnilawma chuan Mizoramin mau a neih sa hman tangkai a, sawngbawl dan ngaihtuah phawt chu an tih hmasak tur thu a sawi.
Aijal Club-a hun hmanah hian Horticulture Minister Prof. Lalnilawma chuan, MHSA member-te chu department hmasawnna tura theihtawpa an suangtuahna seng tura chahin, an suangtuahna te a taka an bawhzui zel chuan ramin hma a sawn ngei a beisei thu a sawi a. Ei leh bara intodelhna kawngah horticulture department chu a pawimawh berte zinga mi an nih thu a sawi.
Prof Lalnilawma chuan, kalphung thar sorkar an nih ang ngeiin a ngai pet peta kal lo vin, thil danglam thlentirtu nih tum theuh turin a chahin, thleibik nei lova mi taima leh a thawk thate beneficiary an thlan thin tur thu a sawi a. Sorkar policy tihlawhtling turin export oriented leh result oriented lamah an ngaihtuahna te hmang turin a chahin, “Kan rama maute pawh kan neihsa hman tangkai a, sawngbawl dan ngaihtuah phawt chu kan tih hmasak tur a ni,” a ti.
Minister chuan kuthnathawktute nen inpawh tlang taka an that tlanna tura tangrual thin turin leh an thlai thar te value added zawnpui a, an income tihpun dan tur ngaihtuah thin turin a chah bawk.
He hunah hian Dr. Jenny Zoremthangi, Dy. Director chuan MHSA thupui ‘Mizoram Horticulture – In Development and way forward’ tih hmangin kalkhawmte zirtirna a pe a. Mizoram zau zawng 21,081 sq. Km atangin Potential Horticulture Area hi 11.56 lakh Ha (55%) a nih laiin, tuna horticulture area an neih mek hi 1.5 lakh Ha (13%) chauh anih thu a sawi.
Sorkar policy ‘Bana Kaih’ hnuaiah thlai pathum aieng, sawhthing leh Mizo hmarchate chu horticulture department hnuai a awm a nih avangin theihtawpchhuaha hmalak dan tur a tar lang bawk.