Aizawl: Lirthei chetsualna thleng thei laka fimkhurna thla, Road Safety Month chu nimin atang khan Mizoram pumah hman tan a ni a; hemi chhung hian No Tolerance Drive kalpui a ni dawn.
Aizawlah chuan Road Safety Month hawnna hi Assembly Annexe Conference Hall-ah neih a ni a, a hmanpuitu, Transport Minister Vanlalhlana chuan Mizoram chu mipui cheng awm zat atanga chhuta lirthei chetsualna avanga nunna chan tamna a nih thu sawiin, kum 2021 leh 2022 dinhmun khaikhinin lirthei chetsualna chu za zela 92.8-in a pung a, nunna chân pawh za zela 101.79-in a pung tih a sawi.
Transport minister chuan road safety month chu sorkar hmalakna pakhat ang leka hman a nih chuan a hlawhtlin dawn loh thu sawiin, a tihlawhtlingtu nih tum theuh turin lirthei khalhtu, a bikin licence neite thlawpna a ngen bakah mipuite chu Road Safety Month hman tur pawimawhna hre thar leh a, nunna hlu tak leh sum pai tam tak hlohna chu pumpelh a nih theih nana theihtawp chhuahpuiah a sawm.
Vanlalhlana chuan sorkar kum kal mek, 2023-2024 hnuaia April-December, 2023 chhungin Mizoramah lirthei ziah luh thar 3,01,680 a awm thu leh thla kaw chhungin kum hmasa lirthei ziah luh a khum tih a sawi a, kawngpui than chak aia lirthei nasa taka pung chuan khawpui tawt siamin kawng inchuhna a siam chhoh mek zel thute, hemi karah hian lirthei khalhtute chu hawihhawmna leh Dan te ngaipawimawh chunga lirthei khalh thin tur leh lauhawm taka lirthei khalh a bikin ‘double overtake’ chu ti lo tawp tur lirthei khalhtute a chah.
Road Safety Month -2024 February thla chhunga hman tur a ni a, thupui chu ‘I him theih nan Traffic Rules-te zawm thin ang che’ tih hman a ni a, State Road Safety Council ruahman angin February 12-17 chhung hian No Tolerance Drive kalpui a ni dawn.
Safety Month chhung hian lirthei fitness uluk lehzuala endik, zirna in hrang hrangah Road Safety Pledge sawi rual, PWD kaltlanga lirthei accident hluarna lai chiang taka lantirna siam, road safety awareness tam thei ang ber buatsaih, media kaltlanga inzirtirna siam leh pawimawh dangte kalpui tum a ni.