Kuminah Mizorama political party lian pathumin an hruaitu tur an thlang thar dawn a, rorel lai ZPM party inthlanna neih tura executive member chuh tumten hming an pe lut tan.
ZPM party chuan Thawhtanni khan General headquarters hruaitu thlan hun chu an puang a, February 15-ah elected office bearer tur thlanna neih a ni ang a, elected office bearer hi floor nomination thlan tur a ni a; elected OB-ah hian post pathum president, vice president leh treasurer te thlan tur a ni.
OB thlan tuk, February 16-ah executive member thlanna neih chhunzawm leh a ni dawn a, mi 100 thlan chhuah tur a ni.
Executive member chuh tumte hian nimin atang khan hming an pe lut tan a, nomination paper hi February 12 thleng theh luh theih a ni.
OB-te hi National Council member, Southern headquarters Executive Committee member, district OB ten an thlang ang.
Mizoram Pradesh Congress Committee (MPCC) pawhin February 20 hian office bearers leh executive member thar an thlang dawn a, OB thar thlanna neih tur atan hian official candidate an siam a, anni bakah hian a duh apiangin OB post pathum – president, vice president leh treasurer te hi an chuh theih dawn.
Party hruaitu ni tura chuh tumte tan February 5 atanga 8 chhungin nomination theh luh hun hawn a ni dawn a. February 20 chawhmaah OB thlanna buatsaih a ni ang a, chawhnuah executive member 60 tur thlanna neih chhunzawm a ni ang.
Mizo National Front (MNF) pawhin kumin hian party hruaitu thlan an nei ngei dawn nia thudawn a ni a, MNF hruaitu ni laite term hi nikum khan a tawp tawh a, hetihlai hian inthlan an neih hun tur erawh an la ruahman fel lo thung a. An president ni mek, Zoramthanga pawhin hruaitute zingah tel a tum tawh lo thung a lo puang tawh a ni.