Aizawl: Central YMA hruaitute chuan nimin tlai khan Mizorama inkalpawhna kawngpui siam hna thawktu, NHIDCL hotute Tuikhuahtlanga an pisa-ah lengah sawmin, thil pawimawh nia an hriatte an sawipui.
Central YMA hruaitute chuan Mizoram hmun hranga NHIDCL-in kawngpui an laih meka harsatna awm leh chin fel ngai ni a lang Sub- Hqrs YMA leh Group YMA atanga report an dawnte an sawi pui a, Mizoramin kawngpui tha kan neih theihna tura theihtawp chhuah zel tur leh harsatna an neihte pawh an hnena thlen zel turin NHDCIL hotute an ngen.
NHIDCL Executive Director Virendra Jakhar chuan Central YMA chu harsatna an tawh apianga an tlan luhna thin a nih thu leh an hnathawhte pawh a tul anga enho zel an duh thu a sawi a, kawng laih meka harsatna awmte leh compensation chungchanga harsatna awmte chu an lo enfiah tur thu a hrilh.
Central YMA hruaitute chuan Vairengte leh Sairang inkar four lane kawng laih tur chungchanga harsatna awmte lo en zui a, sorkar hotute an lo sawipui tur thu an sawi.
Inkawmhonaah hian Central YMA te hi Lalhmachhuana, President leh OB dangte an tel a, NHIDCL atangin executive director-in a ho bawk.