Aizawl: Power & Electricity department chuan tun laiin power supply khaihlaka a awm thin chhan sawi fiahin, kumin thlasik hi kum dang zawng aiin a nat avangin mipuiten heater etc. an hman nasat avangin electric line leh transformer in a zawh loh thin avangin veng thenkhatah inen chhawk a ngaih thin thu an sawi.
Nimina thuchhuah siama an tar lan danin P&E department chuan, phai atanga power supply hmuhna pakhat, Luangmual Sub-Station incoming line ah hian 70MW pelh phal a nih ngai loh avangin thlasikah peak load laiin load shedding inen chhawk a ngai thin a. Power tam zawka lak luh a nih theihna turin conductor lian zawka thlak mek a nih thu te, Tlangnuam Sub-Station-a transformer lian overload avanga load shedding ngai thin tihtawp nan transformer lian dang dah belh mek a nih thu leh, Chawnpui Sub-Station-a transformer lian overload chhawk turin Maumual Sub-station atangin Transformer te (DT) thenkhat chawm then tum niin, heng hnate hi January thla chhungin thawh zawh a nih tur thu an tar lang.
P&E chuan hmun tam taka electric hrui atan bare conductor la hman chu hrui dum (ABC) a thlak vek tum a nih rual hian, hrui (Service connection wire, LPS, Zonet leh Internet Cable) kal fello zawng zawng te siam rem an tum bakah, distribution box kang thin te pawh design thar siamin lei fel tawh niin, he’ng thlak chhung hi hun eng emaw chen chu power khaihlak a la awm zel dawn niin an tar lang bawk.
Hun dang zawng aiin, thlasik chhung bik hian power inrenchem lehzual turin mipuite ngenin, hmasawnna tur hnathawh avanga power khaihlak awm thinah mipuite hriatthiamna an ngen nghal bawk.