Power department atanga thu dawn nitin news a an puan han ngaihthlak hian phai lam atanga power supply kan hmuh that thu leh êng a pangngaia pekchhuah anih thu kan dawng reng a. Mahse, power supply mumal loh avanga mipui phunna chu a ring viau lawi si. Aizawl Veng hrang hrang chu kan in thim chhawk zut zut a. A chhan kan in zawt kual reng a. A tam ber chu transformer chulaiah chuan a kang, line a fall tih vel ani fur reng mai. Power neih a êng tur awm silo hi hriatthiam a har a. Deparment lam lah hian mipui hnena êng pek that loh hi inthiam lohna an nei vak pawhin a lang lem lova. A chhan an puan hian ti thaah an inngai tawh ni maiin a lang.
Engatinge hetia power supply a kal mumal theih loh reng mai le aw. Zawhna chhan mai ngam loh leh harsa ni lo turah ngai ila. Kan power department hian hun rei tak atang tawh khan ngaihsak a hlawh tak tak lova. A ên theih tawk tawk chuan an kal ve naw naw ani berin a lang a. Khawl tha zawk, mipui chawm zo tur ngeia khawl hluite thlak zung zung ai chuan transformer hlui tawh siamthat (repair) a, a theih dan dana tih ên kha an kalphung a ni a. Mipui kan lo pung chho zel a. Power hmang kan tam tual tual a. Connection thar pek loh ngawt theih ani chuang lova. Tin, kan lo changkan chhoh ve hret hretna chuan power min hman tam tir hret hret bawk a. Chu chu a department lam hian an zo lo ani ber mai. Tuna kan kal danah hi chuan kan la in thim chhawkin kan la in ên chhawk nasa tulh tulh dawn niin a lang ber mai. Power hmanga hnathawk tan phei chuan sum tam tak an hloh reng tih hi hrethiam hlawm ila.
Engtinnge he harsatna hi sutkian kan tum le. Kan transformer mipui mamawh chawm zo lote hi thlak thuai thuai dan sawrkar hian a ngaihtuah a va ngai ta em. Kan khawlte leh a hrui hrim hrim pawh hi a hlui tawhin thlak a hun em em vek a. Hmanraw chhe lutuk avangin power distribution ah transmission loss a tam lutuk a. Kan hrui leh khawl hlui lutuk avanga transmisaion loss hi 33% lai nia sawi ani bawk a. Transmission loss kan tih hian pawisa loss a ni a. Electric bill pe tha hle mahila nasa taka a heu reng chuan intuaithar ngaihna a awm miah lo a ni. Chuvangin mipui khawih tak tak power mamawh chungchang hi sawrkar hian thapui thawha a ngaihven a hun ta. Power supply a tawp apianga mipui mitthla a chief minister hmel a lan loh nan kan sawrkar hi power supply mumal zawk leh tha zawk a kal theihna turin chak takin han pen teh se.