Tripura-a CPM state committee chuan Thawhtanni hian Citizenship (Amendment) Bill, 2016 duh loh lantirna an huaihawt dawn tih an sawi.
CPM state secretary Goutam Das chuan, “Sorkar laipui hian he bill hi politics hmanga chi inthliarna thehdarh a. Bill duan hian hmarchhak mipui tam tak rilru a tina a, BJP hian he hmarchhakah hian politics-a inlak len a tum nasa a ni,” a ti.
Das chuan, “Lehlamah dan lova pem lutte chu NRC hmanga hai chhuah a ni a, citizenship bill hmangin sakhuana avanga lo pem lutte pawm a tum si,” a ti bawk.
Bill pass tum mek chu danpui nen inmil lo a nih thu sawiin sorkar laipui chu hnukdawk nghal turin a ti bawk.
CPM hian he bill duh lohna hi an state chhunga an unit tinah an kalpui dawn tih an sawi a. Vantlang inkhawm an huaihawt dawn bakah thil dang hmangin an duh lohzia sorkar an hrilh nawn leh dawn tih an sawi.
Nilaini khan Tripura-ah vek hian tribal hnam behchhan party hrang hrang chuan bill duh lohna hi Tripura Tribal Areas Autonomous District Council headquarters Khumlung-ah an lo huaihawt tawh bawk a. Hetah hian state sorkara BJP thawhpui, IPFT pawh an tel a ni.