Aizawl: MNF party chuan nimin khan thuchhuah siamin, ZPM sorkarin sum an enkawl thiam lo tih a lang cho mek niin an tar lang.
MNF chuan, “December 2023 chawhnu lam ni 15 chhung khan emergency a pekchhuah tul tak tak bak regular payment chu State Finance lamin Treasury te an tihtawp tir vek a. Hemi chungchang sawichhuaktu, Pu Lalchhandama Ralte MLA, Leader of Opposition chu thudik lo sawi ang hialah puh a ni,” tiin, Lalchhandama Ralte hian thudik a sawi ngei niin an sawi.
ZPM hian sorkar hmasa Finance Minister chu sum enkawl thiam lo leh ti tha duh lo ang hialah an puh thin tih tar langin, “MNF sorkar laia Treasury-in sum pekchhuah a control zeuh zeuh thin kha Treasury khar tiin an lo aukhum chamchi tawh a. Sum enkawl thiam tura insawi ZPM sorkar chuan an rawn tawng ve ta a. An tawngkam cheh ang chiah an chunga tla ta chu anmahni ngumkhak hmu lo ang maiin, Treasury khar a ni lo tiin, an rawn tangkhawh leh ta a ni,” an ti.
ZPM sorkar chu sum enkawla harsatna an tawh chu thup buai lo tur leh an harsat avanga Open Market Borrowing atanga Rs vbc 80 an puk hi sawimawi tum lova sum enkawl an thiam loah inngai a, Treasury thawktute hmanga insawi thiam tum chhen tawh lo turin a phut tlat tih MNF thuchhuah chuan a tar lang.