Boxing a inhnek rei ber round 110

Infiamna rothap leh hahthlak ber ber zingah Boxing hi chhiar tel a nih ngei a rinawm. Boxing hian tha thlah hlek a ngai thei lo em em a. Khaw dang hawia mit len sawn zeuh chhung lek pawha khingpuite hnek na tak tawrh thut theih reng a ni a, ‘ring’ chhungah inthlahdah hman a ni lo. Professional boxing-ah hian a tam berah round 12 thleng inhnek a ni tlangpui thin a, round khat hi minute thum a ni tlangpui thin bawk. Infiamna hahthlak, thahrui hman nasat ngai zet mai boxing a inhnek rei ber – Guiness World Records-in a chhinchhiah thlap chu darkar sarih leh minute 19 chhunga round 110 zet inhnek a ni a. Hemi tuma inhnekte hi Andy Bowen leh Jack Burke te an ni.

April 6, 1893 khan USA a New Orleans, Louisiana chuan boxing bout ngaihven hlawh zet mai a thleng a. A hun laia boxer lar pahnih; Andy Bowen, New Orleans leh Jack Burke, Texas te an inhnek. Inhnek hi zan dar 9:15 atangin tan a ni a, inhnek a zawh fel meuh chuan zing dar 4:34 a ni der tawh. Darkar sarih leh minute 19 chhung hian round 110 an inhnek hman. An inhnek chhung a rei bawka inhnek entute pawh an thut hmunah an muthlu nasa hle. Boxer pahnihte pawh hi an chau tawngkhawng a ni ber tawh bawk. Hemi tuma referee John Duffy pawh a hah tlauh tlauh hlein a rinawm.

Boxing chanchina inhnek rei ber hi inhnek lo ang (no contest) ah puan a ni hman zet a. A hnuah thutlukna siam danglamin, inhnehtawk (draw) tih a ni leh ta zawk. Khatih hun lai khan inhnek hun chhung kha a rei thin hrim hrim niin a lang a. Round 110 zet inhneknaah Jack Burke hneh zo bik lo mah se, May 31, 1893 khan Bowen hi round 85 zet inhneknaah chak zawk a ni leh tho thung. Boxer lar Bowen hian inhnek vawi 27 hmachhawnin, vawi 16 a chak a, mi 7 a knock out. Tlawm zawkah vawi thum a tang a, a khingpui nen vawi sarih ngawt an inhnehtawk bawk.

Hetih lai hian Jack Burke hian inhnek vawi 12 a hmachhawn a, vawi nga a chak a, draw vawi li a nei a, tlawm zawkah vawi thum a tang ve thung.

  • Professional Boxing

Boxing chungchanga kan sawi ta sa sa, professional boxing chungchang sawi zui law law teh ang.

Khawvela boxer zawng zawngte hian amateur huang atangin bul an tan a, zau zawk leh hlawk zawka inhnek hmachhawn an duh chinah professional huang an luhchilh zui mai thin. Professional huang an luhchilh atang hian boxing a an hnuhma; an chak, an inhnehtawk leh an chak loh te boxrec.com ah ziahluh thin a ni. Boxrec hian Mizo boxer eng emawzatte hnuhma (record) a chhinchhiah tawh nghe nghe.

Khawvelah hian Professional Boxing pawl lian deuh deuh pali an awm a. Chungte chu; World Boxing Association (WBA), World Boxing Council (WBC), International Boxing Federation (IBF) leh World Boxing Organization (WBO) te an ni a. Heng pawl pali zingah hian pawl upa leh hlun ber chu The World Boxing Association (WBA) a ni. WBA hi kum 1921 a din National Boxing Association (NBA) tia hriat thin kha a ni a. Kum 1962 atang khan tuna a hming WBA hi puttir tan a ni thung.

World Boxing Council (WBC) hi kum 1963 khan din a ni ve thung a, an hmunpui chu Mexico khawpui; Mexico City-ah a awm. International Boxing Federation (IBF) hi kum 1983 a din a ni a. IBF hmunpui hi Springfield, New Jersey, U.S -ah a awm ve thung. Boxing pawl lian pali zinga ngaupang ber World Boxing Organization (WBO) hi kum 1988 khan din a ni a, an hmunpui hi San Juan, Puerto Rico -ah a awm ve thung.

Pawl lian tak tak pali awmin, inrelbawlna hrang thliah thliah bawk mah se boxer te erawh an zalen viau thung a. Pawl hruaitu an awm hrang a, boxer te erawh kha chu pawl hran paliah member ni sa ang vek an ni thung. Pawl pali hnuaiah hian inhnek an hmachhawn thei vek a. Boxer tha falte chuan boxing pawl lian pali hnuaia kawnghren (Title) an la kawp vek thei. Boxing-a pawl hrang hrangte hian boxer te khuahkhirhna khirh tak an nei hran lem lo va, boxer te tana pawimawh ber chu promoter an ni.

Professional boxer te hi promoter nei an ni vek hlawm. Promoter te hian an hnuaia boxer te khingpui tur an ngaihtuahsak a, inhnek an hmachhawnna hmun tur bakah hun leh nite thlengin an ruahman felsak vek thin. Promoter te an indawr fel hnuah tute pawl ( WBA, WBC, IBF leh WBO) hnuaiah nge an inhnek ang tih kha an tichiang zui leh mai thin. Mizoramah chuan LPS Promotion hi professional boxing a promoter kan neih hmasak ber leh lian ber an ni a. Anni hi India ramah pawh Promoter lar leh lian ber pawl an ni pha hial bawk. Boxer te lar leh lar loh, an hlawhtlin leh tlin loh thui tak hril thei an nih vangin promoter te hi an pawimawh hle a ni.

Professional boxer te hi hun rei tak chhung chu Olympic boxing-ah tel phalsak an ni lo ngar ngar a. Olympic a boxing inelnain ngaihhlut a hlawh lo tial tial a, entu pawh a nei tlem sawt viau bawk. Boxing-in Olympic-ah boruak a neih len leh zual theih nan ngaihtuahna thar sen a ni a. Rio Olympic – 2016 atang khan boxing inelnaah professional boxer tel phalsak tan an ni ta a. Boxing pawhin ngaihhlut a hlawh thar leh zual.

Amateur huanga boxing pawl lian ber; International Boxing Association (IBA) in inelna an buatsaihah professional boxer tel an phalsak tak avang hian professional boxer tan kawng a inhawng zau leh zual sauh a. Professional boxer te amateur huangah inlan phalsak an ni hi professional boxer te leh amateur boxer te chher hriam leh zualtu tangkai tak a nih ngei a rinawm.

Amateur huang atanga professional huanga zuan luh hi thil har lo tak mai a ni a. India rama chengte tan chuan Indian Boxing Council (IBC) ah inziah luh tur a ni a. IBC registration hi online hmang pawhin a tih theih hial a ni.

Leave a Reply

error: Content is protected !!