Kar liam ta zirtawpni, Inrinni leh Pathianni khan Europe khawmuala League lian zualte khelh chhunzawm a ni a. England lamah Carabao Cup final khelh a ni bawk. Kar tawpah football hnuhma thar hmuh tur a awm leh nual a. Maipawl pu kher lova kan beng a var leh nan kar tawp football hnuhma langsar zualte kan tarlang leh ang.
- Carabao Cup Final
Pathianni zan khan Wembley Stadium-ah Carabao Cup final khelh a ni a, inkhel hmuhnawm takah Liverpool chuan Virgil van Dijk goal thun hmangin hnehna an chang a, ropui takin an champion. Liverpool hi League Cup-ah vawi 10 an champion na a ni a, League Cup champion tam ber a nihna an tizau a. Vawi riat champion tawh Manchester City aiin vawi hnihin an champion tam zawk mek. Reds hian FA Cup leh League-ah belhkhawma Manchester United champion zat vawi 18 an tluk chiah. United hi FA Cup-ah vawi 12 an champion a, League Cup-ah vawi 6 an champion tawh bawk. Liverpool hi FA Cup-ah vawi 10 champion in, FA Cup-ah vawi 8 an champion tawh bawk.
Chelsea hneha Liverpool champion na goal hi minute 118-naa Van Dijk tauh luh a ni a. Kum 1977 hnu lamah Van Dijk hi EFL Cup-a champion na goal thun har ber a ni. Kum 1977 khan Aston Villa champion na goal chu minute 119-naah Brian Little-a’n a thun.
Liverpool tlanghnung ban rinawm Virgil van Dijk hian final boruak sang a ngam viau thin a. Final vawi thum; Champions League final – 2019, League Cup final – 2022 leh League Cup final – 2024-ahte ‘Player of the match’ ah thlan a ni..
- English Premier League
Arsenal tan Bukayo Saka a chetha chhunzawm zel. Saka hian inrinni zanah 4-1 Newcastle United an hneh tumin goal a thun a, EPL-ah a khelh nga chhung goal a thun zawn ta chiah. Ian Wright (Novemver 1994) hnu lamah Saka hi English player zingah EPL-ah khelh nga chhung goal thun zawn leh thei hmasa ber a ni.
Manchester City tan Phil Foden a chetha chhunzawm zel. Foden hian EPL season kal mekah goal 9 thunin assist vawi 5 a nei tawh a, goal 16-ah a inrawlh tling tawh. Hei hian EPL a chetthat ber record a tluk der tawh a. A mimal record a khum ngei dawn niin a lang.
- Spanish LaLiga
Pathianni zan khan La Liga hmahruaitu Real Madrid chuan 1-0 in an mikhual Sevilla an hneh. Sevilla an hnehna goal hi kum 38 leh ni 169-a upa Luka Modric thun a ni a. Modric hi Ferenc Puskas hnu lamah La Liga-a Real Madrid chakna goal thun thei upa ber a ni a. Modric chunga awm Ferenc Puskas hian kum 1965 khan kum 38 leh ni 212 a upa ni chungin Zaragoza laka Real Madrid chakna goal a thun.
Inrinni zanah Almeria leh Atletico Madrid te 2-2 a an inhnehtawk tumin Almeria tan kum 19 mi Luka Romero chuan goal hnih a thun. Romero hi Lionel Messi (2007) hnu lamah La Liga big 3 team laka goal hnih chin thun leh thei naupang ber a ni.
- Italian Serie A
Inter Milan tan Argentina forward Lautaro MartÃnez a chetha chhunzawm zel a, 4-0 a Lecce an hneh tumin Martinez hian goal a thun a, Serie A-ah goal 100 a thun tling ta chiah. Serie A-ah foreign player zinga goal 100 thun tling thei pa thumna a ni a, Stefano Nyers leh Mauro Icardi te hnung a zui.
Martinez hoan season kal mekah goal 25-ah a inrawlh tling tawh a. Erling Haaland, Harry Kane, Kylian Mbappe leh Mohamed Salah te hnung zuiin season nga chhung goal 25 ah inrawlh tling a. Hnuhna tha a hnutchhiah.
Juventus boss Massimiliano Allegri chuan Serie A-ah point 1002 a hmu tling ta chiah a. Kum 1929/30 hnu lamah manager zingah Serie A-ah point 1000 chuang hmu thei hmasa ber leh awmchhun a ni. Point 1002 hmu tur hian vawi 301 hnehna an chang a, draw vawi 99 an nei. Point hmuh lova tlawm vawi 96 lai an nei ve tho bawk.
- German Bundesliga
Bayern Munich forward Harry Kane chuan an mualah goal 17 a thun tling tawh a. Kane hian Tottenham tan a khelh lai 2016-17-ah an muala goal 17 a lo thun tlin tawh record a nih rual a. A mimal record a siam ngei tura ngaih a ni.
Harry Kane goal hnih hmanga RB Leipzig hnehtu Bayern Munich hian an mualah vawi 1000 an khel tling chiah a. Bundesliga club zingah an muala vawi 1000 khel tling thei hmasa ber an ni.
Kum 20 leh ni 296 a upa Bayer Leverkusen forward Florian Wirtz chu goal 50-ah a inrawlh tling ta chiah a. Data Collection siam a nih hnu 2004-05 hnu lamah goal 50-a inrawlh tling Wirtz aia nuapang pahnih chiah; Jadon Sancho (kum 19 leh ni 299) leh Kai Havertz (Kum 20 leh ni 270) te chiah an awm.
Xabi Alonso hnuaia khel tha tak Bayer Leverkusen chuan zirtawp zan khan an mualah hnehna an chang a. Leverkusen hi season kal meka inelna hrang hrangah tlawm nei lovin vawi 33 an kaltluang ta chiah a. German Bundesliga club zingah tlawm nei lova kal tluang rei ber record thar siamin, Bayern Munich record 32 an khum