2024-25 Mizoram budget Rs. vbc 14,412.12 pharh

Chief Minister Lalduhoma’n nimin khan kum 2024-25 chhung atana Mizoram sum ruahman Rs. vaibelchhe 14,412.12 chu assembly-ah a pharh a, 2023-24 budget aiin Rs. vaibelchhe 202.17-in a tam zawk.

Finance changtu, Lalduhoma hian Mizoram budget tur a pharh rualin hian kum kal laia sum hman ruahman belhna, Supplementary Demands for Grants 2023-2024 Rs. vaibelchhe 3,287.93 chu house pawmpui turin a pharh nghal bawk.

Budget a pharhah hian sorkar inrelbawlna senso, sorkar hnathawk hlawh leh pension bakah hmasawnna thawhna tur atana sum hman tur ruahman (revenue expenditure) hi Rs. vaibelchhe 11,957.04 a ni a, budget pum pui atanga chhutin za zela 82.97 a ni a; mipui hmasawnna atana sum hman tur (capital expenditure) atan Rs. vaibelchhe 2,455.08 dah a ni a, hei hi sum ruahman zawng zawng atanga chhutin za zela 17.03 a ni thung a, kum thar 2024-2025 chhunga sorkar sum puk tur zat ruahman chin chu Rs. vaibelchhe 1,992.03 a ni.

Finance changtu Duha chuan revenue expenditure atana sum an ruahman chu sorkar kum 2023-2024 aiin za zela 6.75-in a sang zawk tih sawiin, hetia kum kal mek aia a san hretna chhan chu salary leh pension atan sum sen belh a ngaih vang te, kawlphetha leina, tui pump-na bill sang chho zel te, buhfai leina san hret zel vang leh private sikul thenkhatte dinhmun tha zawka hlan a nih vangte a ni, a ti.

Mipui hmasawnna atana sum hman tura ruahman chu kum kal mek aia a hniam a, hemi chungchang hi Duha chuan sawiin, “Tun dinhmuah hian state sorkar hian inenkawlna sum hman ngei ngeina tur a ngah avangin revenue receipt atang ringawt chuan a inenkawl zo lo va, capital expenditure atana sum dah tur chuan loan-ah a innghat lo thei lo,” a ti a, an sorar chhung chuan a tam thei ang ber hmasawnna hna thawhna tur ruahman chhoh an tum thu a sawi.

CM Duhoma’n a tar lan danin budget-ah hian sorkar flagship programme, ‘Bana kaih’ (hand holding) policy hmanga ram chhunga kuthnathawktute tihhmasawnna turin Rs. vaibelchhe 200 ruahman a ni a, thingtlang lam mi khawsak harsa zualte khawpuia an borala, an ruang phurh hawna atan Rs. vaibelchhe 5 ruahman a ni a, kawlphetha siam chhuah leh kawlphetha pek chhuah mumal zawka kalpui a nih theih nan Rs. vaibelchhe 20.13 dah a ni a, inkalpawhna kawngpui leh leidawh thawm that ngaite thawm that nana kum 2024-25 chhunga hman turin Rs. vaibelchhe 100 dah a ni bawk.

Kum khat Mizoram sum ruahman thlirna tawi

  1. Kum thar 2024-2025 chhunga sorkar sum puk tur zat ruahman chin chu Rs vbc 1,992.03 a ni a. Heta tang hian Scheme for Financial Assistance to States for Capital Investment (SASCI) hnuaia kum 50 hnua rulh tul interest-free loan Rs vbc 500.00; Market Borrowing-ah Rs vbc 1,170.00 leh NABARD hnuaiah rural infrastructure tihchangtlun a nih zel theih nan Rs vbc 250.00 te hi a lian zualte an ni.
  2. Sorkar laipui scheme CSS sum lo do letna tur te, EAP scheme-a state sum tum ve tur lo dah zel theihna turin counterpart funding atan Rs vbc 250 dah a ni.
  3. Sorkar flagship programme, ‘Bana Kaih (Hand Holding) policy’ hmanga ram chhunga kuthnathawktute tihhmasawnna turin Rs vbc 200.00 ruahman a ni.
  4. Thingtlang lam mi khawsak harsa zualte khawpuia an thihin, an ruang phurh hawna atan Rs vbc 5 ruahman a ni a. Social Welfare dept kaihhruaina hnuaiah buaipui a ni ang.
  5. Healthcare lama indaih loh phuhruk nan kum 2024-25 atan Rs vbc 50 dah a ni. Hemi bakah Rs vbc 40 chu bill ba rulh nan 2023-24 RS-ah dah a ni bawk.
  6. Power generation (siamchhuah lam) leh power supply mumal zawka kalpui a nih theihna Rs vbc 20.13 dah a ni.
  7. Inkalpawhna kawngpui leh leidawh thawm that ngaite thawm that nan kum 2024-25 chhunga hman turin Rs vbc 100 dah a ni.
  8. Thlai chi thlan bik 4 – sawhthing, aieng, hmarcha leh hmunphiah te hi minimum support price hmanga a tul dan anga loneitute hnen atanga leisak thei tura ruahmanna siam niin, budget ah pawh dah nghal a ni.

Leave a Reply

error: Content is protected !!