Nilaini zing khan NBA regular season khelh chhunzawm a ni a, Dallas Mavericks leh Milwuakee Bucks ten hnehna an chang. Western Conference-a pahnihna Oklahoma City Thunder chuan hnehna an chang ve bawk.
Dallas Mavericks leh Cleveland Cavaliers ten inkhel hmuhnawm tak an lantir a, an inhnehtawk hle. Cavaliers lakah Mavericks in bul an tan tha a, hun tawp dawn tepah pawh hmahruaitu zawkah tangin an chak tlang teuh hle. Hun tawp dawn hnaiah Cavaliers in na takin an khingpuite an nawr let a, inlehthalna lian thlen tir in, hnehna pawimawh tak an chang.
Quarter hmasa berah point 1-a an hnufual hnuin quarter hnihnaah Cavaliers an insiamtha a, point ngain an chungnung zui ve nghal a. Point li a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui hle. Quarter thumnaah point thumin Mavericks an chungnung a, quarter hnuhnung ber an khelh tan thlengin an inkarah point khat chiah a tla zep. Quarter hnuhnung berah Mavericks an chetha a, point 10 zette a hma an hruai hman vangin an chak teuh hle. Hun tawp dawn tep-ah Cavaliers hian na takin an nawr let a, point an thawkchhuak zawn. Hun tawp dawn tepah Max Strus chuan 59ft zeta sangin ball a vawm a, point thum a vawm lut. He a point thum thawhchhuah hmang hian point khatin an khingpuite hi an lehthal thei hram a. Inkhel hmuhnawm takah 121-119 in hnehna an chang zui ta a ni.
Cavaliers chakpuitu Max Strus hian point 21 a thawkchhuak a, point 21 thawkchhuak tur hian three point vawi nga ngawt a vawm lut. Cavaliers tan hian Donovan Mitchell chuan point 31 a thawkchhuak ve bawk. Tlawm zawka an tan tum hian Eastern Conference-ah pahnihna ni mek Cleveland Cavaliers tan Luka Doncic chuan point 45 lai a thawkchhuak.
Nilaini zinga inkhel dangah Eastern Conference-a pathumnaa awm mek Milwuakee Bucks chuan point 123-85 in Charlotte Hornets an sawp a. Bucks tan hian Giannis Antetokounmpo chuan point 24 a thawkchhuak a, Damian Lillard chuan point 23 a thawkchhuak ve bawk.
Inkhel dangah Western Conference hmahruaitu Minnesota Timberwolves chuan point 114-105 in San Antonio Spurs an hneh a. Western Conference-a pahnihna ni mek Oklahoma City Thunder chuan an khingpui Houston Rockets chu point 112-95 in an hneh. Eastern Conference hmahruaitu Boston Celtics pawhin an khingpui Philadelphia 76ers chu 117-99 in an hneh a. Celtics chak tual hian Detroit Pistons pawhin Chicago Bulls an hneh a, vawi ruk an tlawm zawn tawhna an titawp ve bawk.