Ramri-ah zan khawthlirna nena inthuam ralsai thiam

Jammu & Kashmir phaikuama che thin firfiak pawl zingah ralsai thiam (sniper) an awm thar nia hriatna a awm a, venhim hnathawktute tan hna a hautak phah hle a. VIP-te tan pawh hmun hlauhawm a ni zual hle dawn nia ngaih a ni.

Kar hmasa khan heng lai hmunah hian sipai leh paramilitary force mi 2 kah hlum an ni a, heng mite hi hla tak atanga kah ve ve an ni.

Venhim hnathawktuten an rin dan chuan firfiak pawh ralsai thiamte hi hmun khatah hun rei tak tak an awm a, hun remchang an hmuh hun an nghak ngar ngar a, remchang an hlah lo niin an ngai a. Hei hi mi pawimawh (VIP)-te dinhmun tihlauhthawnawmtu niin an hria.

Inrinni khan CISF-a assistant sub-inspector Rajendra Prasad chu hetiang deuh hian Srinagar daiah kah hlum a ni a. October 22 khan sniper ni ngeia hriatin CISF mi 2 kap hlumin October 25 khan Tral-a inbeihnaah Army kah hlum a ni tawh bawk.

Firfiakte hian ralsai thiam bakah hian zana khawthlir theihna (night-vision glass) tha tak, thimah pawh hla taka mi hmuh theihna an nei nia ngaih a ni a. An beih tum chu ngun takin an thlithlai thei reng niin an hria a ni.

Police officer pakhat chuan heng firfiakte hian American M6 rifle an hman hial pawh an ring tih a sawi a, “An silaiah NVG an vuah thei bawk,” a ti.

Inspector General of Police pawhin police headquarters-ah sniper an awm theih thu hi ziakin a thlen tawh a. Venhim hnathawkte chu thuhran ni se, VIP-te chu ngun takin, ralthuam famkim nena ven ni mah se ralsai thiam tan chuan kah an harsa miah chuang lo a ni.

Leave a Reply

error: Content is protected !!