Lui zawng zawng ni lovin, lui eng emaw zat khuah loh theih loh a ni – Duha

Aizawl: Chief Minister Lalduhoma’n kawlphetha siam chhuah nan Mizoram luite chu khuah vek tum a nih loh thu sawiin, kawlphetha mamawhna avangin lui eng emaw zat chu khuah loh theih loh a nih thu House-ah a sawi.

Nimina Mizoram Assembly budget session-ah East Tuipui bialtu MLA Ramthanmawia’n tun sorkarin power siam chhuah kawnga hmalak chhoh a tum dan a zawhna, P&E Minister F Rodingliana’n a chhanna leh zawh belhna kal zelah chief ding chhuakin kawlphetha siam chhuah kawnga sorkar hmalak tum dan a rawn sawi fiah.

Chief minister chuan Mizorama lui awm zawng zawng khuah a, environment nasa taka tihchhiat chu an phal lo tih a sawi a. Hetihrual hian kawlphetha mamawhna a san bawk si avangin lui eng emaw zat chu loh theih lohah khuah a ngaih tur thu a sawi.

Lalduhoma chuan hydel project thenkhat chu compensation leh forest clearance vanga chhunzawm theih loh a nih thu sawiin, kawlphetha MW 24 pe chhuak thei tur, Tuirini Small Hydel Project tihnun leh an tum thu sawiin, “Externally added project atangin New Development Bank-in a finance tur a ni a. Soft loan a nih avangin a pung pawh zaa 1.25 chauh a ni a. A project a tha hle, kum 19 atana tih a ni a, kum 15 chhunga rulh tur a ni a. A DPR hi March, 2007-ah buatsaih ni daih tawh mah se, kum 2022-ah Rs vbc. 584 ngai tura chhut a ni,” tiin, hei hi central lam hotute pawhin an pawm tawh thu a sawi.

Chief minister chuan nikum inthlan hma lawk November thla chho velah khan sorkar hmasain a lo thlauhthlak tak thu a sawiin, “Hei hi kan ui em em a, tihnun leh tumin tunah hian hma kan la. Kan tinung leh thei ang em tih kan chiang lo va; mahse, kan indawr leh tan mek tawh a, tih theih hram nise kan duh,” tiin, Tuirini Small Hydel Project chu a hlawhtlin leh theih chuan kawlphetha siam chhuahte chu a vaiin Mizoramin a neih tur thu a sawi bawk.

Leave a Reply

error: Content is protected !!