Ramri hung leh FMR tihtawp tum duh lohna resolution pawm

Myanmar ramri hung tumna leh ramria zalen taka intlawhpawh theihna, Free Movement Regime (FMR) tihtawp tum duh lohna nimina Assembly House-a Home Minister K Sapdanga’n a put luh chu sawi ho a nih hnuah lungrual taka pawm a ni.

K Sapdanga official resolution a put luh hi ‘Central sorkarin Free Movement Regime (FMR) tihtawp a tum leh Myanmar nena kan inrina, Border fencing kalpui a tum hi tha kan ti lo va, titawp turin kan ngen a ni. Dik lo taka British sorkarin devide and rule policy hmanga Zofate min thendarh hi, rorelna pakhat hnuaia kan kun leh theihna turin hma min lakpui zawk rawh se’ tih a ni.

Resolution a put luh paha thu a sawiah K Sapdanga hian Zofate hi khawchhak lam atanga tla thla tih sawiin, “India, Bangladesh leh Myanmar ten ramri hrang neia an awm hma a tlang hrang hrang bawh a, mahnia ro inrela khawsa thin an ni a. Mizote hi British-in a rûn a, a awp khan, awp beh an awlsam nan an thendarh a, hnam khat na na na chu British mite zingah pawh rorelna pakhatna hnuaia an awm duhsaktu pawh an awm ve tho a. January 20, 1892 khan Calcutta-ah Chin Lushai Conference koh a ni a, Zofate hi rorelna pakhatna hnuaia an awmna turin thutlukna siam a ni a. Heihi puitlin a nih tak loh avangin vawiin ni thlengin thendarhin an awm phah ta a ni,” a ti.

Home minister chuan Mizote chu British-in an hawsan hnu khan Myanmar, India leh Bangladesh-ah thendarh an ni tih sawiin, “Engtik niah emaw chuan he barhluih ramri hi tihbo a la ni ang a, rorelna pakhatna hnuaiah an la awm leh ngei ang tih an thlir mek lai a, barhlui ramri chawi nuna, tihngheh lehzualna tura hmalakna reng reng chu, FMR tihtawp a ni emaw, ramri hung a ni emaw pawh ni se, Zo hnahthlakte tan thlawp theih a ni lo va, dodal zel chu hnam anga an mawhphurhna a ni,” a ti bawk.

Official resolution put luh sawihona hunah member eng emaw zatin an thlawp thu an sawi a. Chung zingah MNF member te pawh an tel a. Hetih lai hian, BJP member Dr K Beichhua chuan official resolution chu a that viau rualin sorkar laipuiin ramri hung leh FMR tihtawp tumna chungchangah hriattirna engmah dawn a la nih loh avangin house-a put luh chu a la hma deuh nia an hriat thu a sawi thung.

Leave a Reply

error: Content is protected !!