Nilai zan khan English Premier League khelh chhunzawm a ni a, champion beisei Liverpool chu Everton hneh lovin an tlawm a, champion an hlat deuh deuh zel. Team lian Liverpool an tlawm lai hian Manchester United chuan Sheffield United an lehthal a, point thum an hmu ve thung.
- Reds an vul thei lo
Trophy lian pathum lak beisei sang tak nei hman Liverpool tum a fuh thei lo va, chak an harsat. FA Cup leh Europa League atanga an tlak hnuin EPL lamah pawh champion an beiseina a khawk tan. Arsenal hnaih a, Manchester City um zel tura chak mamawh Liverpool hi table hnuai lama awm mek Everton lakah si hnih faiin an tlawm a, point thumin Arsenal an phak lo. Liverpool lakah point thum hlutak an hmuh vangin Everton hi him thei turin dinhmun tha takah an ding ve thung.
Goodison Park-ah chak mamawh tak chunga lenglut Liverpool lakah Everton in bul an tan tha a, goal an thun har lo. Club lian zawkte pawhin an ngaihven Jarrad Branthwaite chuan minute 27-naah hmahruaina goal a thun. Merseyside derby-ah goal an thun hmasak vangin Toffees an phur viau a, an mualah phur leh tha tho takin an inlan chhunzawm. Chawlhlawk hmanin goal thun theihna hun tha nei bawk mah se goal an thun thei belh thei lo va, Liverpool pawhin an hun tha neih an chhawr tangkai thei lo bawk.
Point hlawhchhuak turin goal thun mamawh viau mah se Liverpool in an si phurh an sut mai thei lova, second half tir lamah goal an chhuah belh leh thuai. Minute 58-naah Everton forward Dominic Calvert-Lewin chuan McNiel siamsak atangin an goal hnihna a thun a, an hmahruaina a tizau. Si hnih an phurh hnuin Liverpool in goal thun tumin tan an khawh nasa viau naa hun tawp thlengin an hlawhtling zo lo va, inkhel pawimawh takah an tlawm. An goal hnih thun an venhim theih hlauh vangin Everton chuan Liverpool an hneh nawlh a, October 2010 hnu lama a vawi khat nan Merseyside derby-ah hnehna an chang.
Everton lakah an chak loh vangin Liverpool tan champion a harsa leh zual dawn. Hmahruaitu Arsenal nen an inkhelh zat inang chungin point thumin an hniam zawk. Champion lai leh champion leh tura rinkai ber Manchester City chu an hnuaiah awm mek mah se City hian vawi hnih ngawtin an khel tlem zawk thung. Liverpool khelh zat an khelh hunah City hian Reds hi lehpel daih thei dinhmunah an ding a, Reds hi pathumnaah tlahniam thei dinhmunah an ding mek a ni. Hetih lai hian 16-naa awm mek Everton tan erawh him beseina a sang ta viau thung.
- United in Sheffield an lehthal
An hmelma lian Liverpool an tlawm laiin Manchester United erawh chuan an mikhual Sheffield United an lehthal a, an mualah point thum an hmu ve thung.
Table hnuai bera awm mek Sheffield United hi an lenluhna mualah Old Trafford-ah an khel tha viau a, tum hnih ngawt hmahruai zawkah an tang.Minute 35-naah Jayden Bogle chuan hmahruaina goal a thun. Si an phurh hnuin United an insiamtha thuai a, Harry Maguire chuan minute 42-naah goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Sheffield United in in goal an thun hmasa leh a, Ben Brereton Díaz chuan minute 50-na lekah hma an hruai nawn lehna goal a thun. An mualah ngei hnufual nawn leh mah se United an buai chuang lo va, tha zawkin an inlan chhunzawm. United hian minute 61-naah penalty an hmu a, he penalty hi Bruno Fernandes chuan pet goal in an si phurh a sut. United captain Fernandes hian miute 81-naah an hmahruaina goal a thun leh nghal zat. 3-2 a hma an hruai let hnuin minute 85-naah Rasmus Højlund chuan goal thunin an chakna a nem nghet a, an mualah ngei 4-2 a hnehna changin, point thum an hmu ta a ni.
United lakah an tlawm leh tak vangin Sheffield United hi tla tluk an ni tawh a, him turin thil mak an thlentir a ngai hial tawh. An muala chak United hian Europa League tal khelh phak tumin tan an khawh chhunzawm ve thung ang.
Nilai zana inkhel dangah Crystal Palace chuan an mikhual Newcastle United chu si hnih faiin an hneh. Hetihlai hian Wolves erawh chu an mikhual AFC Bournemouth lakah si khat faiin an tlawm ve thung.