Club thuneitute nen an indawr hnuin Barcelona manager Xavi chuan a thutlukna lo siam tawh a sut a, kum 2025 thleng Barcelona a enkawl chhunzawm dawn.
Barcelona player ropui zinga mi Xavi hian Qatari club Al Sadd a enkawl hnuin November 2021 atangin khan a hmangaih FC Barcelona a enkawl tan. Season tluana Catalan club lian a enkawl hmasak berah La Liga trophy a lakpui nghal a, bul an tan tha viau. An champion hnuin season kal mekah an chetha tawk lova, an hmelma lian Real Madrid an el phak lo. La Liga trophy an enkawl mek an hloh ngei dawn tih a chiang thawkhat tawh a, Champions League atanga an tlak tawh bawk si vangin Barca hian kut bengin season an khar dawn niin a lang.
Beisei anga an chet that loh bakah player duh ang an lak theih bawk si loh vangin Xavi hian a hna kalsan mai a duh a, January thla khan season tawp ruala a hna a bansan thu a sawi. Bang turin thutlukna lo siam tawh mah se club thuneitu ten a thu tlukna siam tawh sut leh turin an dawr a, a contract neih mek hmang zo hram turin an ngen. Barcelona President Joan Laporta chuan ama chenna In ah Xavi hi kawmin, a thutlukna sut turin a ngem a, an inthlem thlu ta nge nge a, Xavi hi Nou Camp-ah 2025 season tawp thleng cham turin an hmin.
Barcelona leh Spain midfielder ropui Xavi hian kum 1998 – 2015 chhung khan FC Barcelona tan hian inelna hrang hrangah vawi 767 a khel a, goal 85 a thunin trophy 25 zet an la bawk.