May 8, Nilai zan khan UEFA Champions League semi-final khelh zawh a ni a. Santiago Bernabeu-a inkhel hmuhnawm takah UCL a chungchuang bik Real Madrid chuan Joselu goal thun hmanga hnehna changin final an lut. Real Madrid hian final-ah Borussia Dortmund an hmachhawn zui leh ang.
Semi-final thawh khatnaah Real Madrid leh Bayern Munich te hi 2-2 in Alianz Arena-ah an lo inhnehtawk tawh a, final lut tur zawk tan Santiago Bernabeu-ah chak ngei ngei a ngai. An muala khel tur an nih bakah Champions League-a ropui danglam bik an nih vangin Carlo Ancelotti enkawl Real Madrid hian Bayern Munich aiin rin an kai zawk a, German club lian an sawp theih hial rin a ni.
Khelmual ropui Santiago Bernabeu a inkhelah team hnihte an fimkhur dun a, goal pawh a lut har hle. Mualneitu Real Madrid hi hlauhawm zawk ni mah se si nghak chetha tak Manuel Nuer an paltlang thei lova, an mualah beisei angin goal an thun hma thei lo. An hun tha an hloh fo vangin Lod Blancos hian goal an chhuah hmasa ta zawk hial. Bayern Munich tan hian Real Madrid in lak tuma an hel mek Alphinso Davies chuan minute 68-naah pui zet maiin a pet goal a, hmahruaina goal a thun.
Team ropui Real Madrid mualah ngei goal thun hmasa zawk an nih vangin Bayern an phur a, fimkhur takin an inlan chhunzawm. Counter attack chhawr tangkaiin goal thun belh theihna hun tha an nei a. An goal thun khawl Harry Kane chuan uiawm taka hlahin an hmahruaina a tizau thei lo. Kane hian goal thun ngat se chuan Bayern hian final an luh zawk ngei a rinawm.
Hnufual zawk an nih vangin Real Madrid an buai lova, an zam hek lo. Hun harsa leh khirh an hmachhawn chiah hian an ropuizia tihchianin a awm a, an khingpuite hi buai lo thei lovin an siam. Tlawm thei dinhmuna an din lai hian Ancelotti thluak thatzia a lang chiang nawn leh a, fuh zetin a player a thlak kual. Huaisen leh taima taka an nawr rah an seng bakah an vannei tel a, Real hian hun tawp dawn hnaih minute 89-naah an si phurh sutna goal an thun. An si phurh sutna goal thuntu Joselu hi Ancelotti-a’n hun tawp dawn hnaiha a luhtir a ni. Real in an goal khatna an thun danah Bayern an vanduai tel. Si nghak chetha tak Manuel Nuer a chesual a, ball a man per. Ball per hi Joselu chuan rang zetin a pet goal a ni.
1-1 a nih hnuin Real Madrid an phur a, Bayern an buai ve thung. Ancelotti-a’n thutlukna fing leh dik a siam laiin Bayern manager Thomas Tuchel-a thutlukna a siam sual ve thung a, hei hi German club in an tuar. Tuchel hian goal an thun hnuin goal nawrna kawnga thawhhlawk tak tak Harry Kane, Leroy Sane leh Jamal Musiala te a la chhuak. Kane, Sane leh Musiala te chhuah hnuin Bayern nawr a hlauhawm thei meuh tawh lova, Real Madrid hian an duh ang thalin an mikhualte an nawr theih phah. Na taka an nawr rah an seng zui leh thuai a, Antonio Rudiger siamsak tha tak chu Joselu chuan minute 90+1 ah awlsam takin a pet goal a, hma an hruai letna goal a thun.
Hnufual zawk an nih hnuin Bayern hian goal chhuah belh huamin an khingpuite an nawr a, an vannei teuh hle. Hun pek belh tawp dawn tepah defender Matthijs de Ligt chuan goal a thun. He goal hi offside vangin hnawl a ni a, Real Madrid an him. Hun tawp thlengin goal dang a luh belh thei tawh lova, Real Madrid chuan Bayern Munich chu si belhkhawmah 4-3 a hnehin final an lut a, Borussia Dortmund an hmachhawn zui leh ang. UCL final hi June ni 1, Inrinni zanah khelmual ropui Wembley Stadium-ah khelh a ni ang.
- Offside sawi zui hlawh chu
Real Madrid laka Bayern Munich an tlawm tum hian offside vanga Matthijs de Ligt goal hnawlin sawi zui a hlawh hle. Titi siamtu ber chu thutlukna dik siam tura VAR rawn a ni lo kha a ni.
He thil thlengah hian goal thuntu De Ligt chuan assistant referee Tomasz Listkiewicz in a tihsual vanga ngaihdam a dil thu a sawi a. Bayern manager Thomas Tuchel pawhin ‘Phatsanna’ tiin a sawi zui ve bawk.
Hetihlai hamrik ham a nih hnua De Ligt hian goal thun a ni a, hamrik ham a nih vang vekin Real Madrid player te an inhtlahdah tawh vangin De Ligt ngei pawh hian goal thun thei mai a nih thu an sawi ve thung. Hei hi thil thlen dan dik tak a ni a. Hamrik ham hnua thil thleng a nih miau vangin VAR pawh rawn theih ni ta lo a ni bawk a. Bakah, offside awm ngeiin chiktu thenkhat chuan an ngai hlawm bawk.
Hetiang ngaihdan a awm lai hian 1st referee leh assistant referee te hian tih dik loh an nei ve tho nia ngaih a ni tho bawk. VAR hman a nih hnu hian goal bul hnaihah VAR rawn theihna awm thil thleng a awmin flag vai a ni mai ngai lova, 1st referee pawhin a ham mai ngai lo bawk. Thil thleng tur a thleng zo a, a goal zui a nih chuan foul dang leh offside ngei pawh phar that a ni a, VAR rawn a ni zui mai thin. Hetihlai hian assistant referee Tomasz Listkiewicz chuan rang zetin offside a phar a. 1st referee Szymon Marciniak-a’n rang zetin a lo ham ve mai bawk. Chu chu an tihdik loh lian ta ber chu a ni a. VAR rawn ni ta se offside tiin pawm a ni thei a, offside a awm lo tiin pawm a ni tho mai thei bawk.