India-a eptu tangrual, INDIA-in Lok Sabha speaker chu BJP kaihhruai National Democratic Alliance (NDA) tangruala an thawhpui, Janata Dal (United) emaw, Telugu Desam Party (TDP) emaw atangin a ni tur a ni tih an sawi hnu lawkah heng party pahnih hian ngaihdan dang an nei thung.
Nitish Kumar-a kaihhruai JD(U) chuan BJP-in thutlukna an siam ang apiang an pawm mai dawn tih an sawi a. N Chandrababu Naidu-a kaihhruai TDP pawhin rorel lai tangrualte chuan candidate-ah an inrawn tlan mai tur thu an sawi ve bawk.
JD(U) hruaitu, KC Tyagi chuan Inrinni khan an party leh TDP chu NDA-a tangho an ni a, BJP-in an candidate apiang chu an thlawp mai tur thu a sawi.
“JD(U) leh TDP hi NDA-ah kan nghet em em a. Speaker atan pawh BJP-in an vawrh chhuah apiang chu kan thlawp mai dawn a ni,” tiin Tyagi hian ANI a hrilh.
TDP national spokesperson Pattabhi Ram Kommareddy erawh chuan hetiang hian a sawi ve lo thung a. The Indian Express chanchinbuin an kawmnaah candidate tur chu NDA-a tanghoten an sawiho tur thu a sawi ve thung.
“NDA-a tanghote hi thukhawmin speaker atanga kan vawrh chhuah tur pawh kan sawiho ang. Kan inrawn tlana thutlukna kan siam hunah TDP pawh telin, party tangho zawng zawngten kan thlawp dawn a ni,” a ti.
Lok Sabha inthlanpui neih zawh takah khan BJP hian MP 240 neiin anmahnia sorkar siam turin 32-in an daih lo va. Naidu-a party-in 16 leh Kumar-a’n 12 thawhin anni hi Prime Minister Narendra Modi-a’n a term thum nana sorkar a siam lehnaah thawhhlawk leh pawimawh tak an ni.
Thla tirah khan INDIA-a tel, Aam Aadmi Party (AAP) chuan speaker hi JD(U) emaw, TDP emaw tan zuat ngei ngei tur a nih thu an lo sawi tawh.
Congress hruaitu, Ashok Gehlot pawhin BJP-in speaker nihna an chang leh a nih ngat chuan JD(U) leh TDP MP te inkarah inpawhna a awm phah dawn niin a sawi.
“TDP leh JD(U) chauh ni lovin, ram pum hian Lok Sabha speaker tur thlanna tur hi an ngaihven a. BJP hian nakin zel atana mipui rorelna kalhmang lo taka thil kalpui zui zel an duh bik a rinawm loh va, speaker nihna hi an thawhpui zinga pakhat hnenah an pek ngei a ngai a ni,” tiin Gehlot hian Hindi-in X-ah a tar lang.
“Tunah hian BJP hian Lok Sabha speaker dinhmun an chang leh a nih ngat chuan TDP leh JD(U) hian an MP-te chu an pawt ngei dawn a ni,” a ti.
BJP kaihhruai NDA-a an thawhpuite hian Prime Minister Modi-a cabinet-ah hmun pawimawh an chang nual a. Hetih rual hian member ngah ber, BJP chu an chanvo a tha ber tho.
Lok Sabha speaker tur hi June 26-ah thlan a ni dawn a ni.