Paris Olympic neih mekah Belgium tan Remco Evenepoel chuan Thirsakawr inkhalhsiak atangin Gold Medal a la. Cycling Time Trial atanga Gold Medal la Remco Evenepoel hi Liverpool leh Netherlands forward Gody Gakpo nen lo khel dun tawh thin a ni.
Paris Olympic a Gold Medal la Evenepoel hi a naupan lai chuan ball pet thiam tak mai a ni a, Belgium rama club lian leh hlun Anderlecht-ah football zing kawng a zawh tan. Ball thiam, hma lam hun eng tak nei a nih vangin kum 11 leka upa a nih laiin football a ram ropui zawk Netherlands a pan a, player tha tak tak chherchhuak tawhtu PSV Eindhoven academy a zawm. PSV academy-ah hian Liverpool leh Netherlands player pawimawh ni mek Gody Gakpo te nen hian an awm ho a, an khel tlang thin.
PSV academy-ah kum thum hun a hman hnu, kum 14 mi a nih laiin Belgium-ah a kir a, Belgian U15 leh U16-ah captain a ni zui ta hial nghe nghe. Belgium U15 leh U16 ah hian Belgium player lar mek Lois Openda leh Arsenal tana khel mek Albert Sambi Lokonga te nen an khel ho thin. Age level-ah captain te hial a nih thin vangin Belgium senior team ah tel chho ngei tura ngaih niin, football ngaina tuten a lakah beiseina sang tak an nei.
Remco Evenepoel a pa Patrick Evenepoel hi Thirsakawr khalha ei zawng (professional cyclist) a ni. Evenepoel ngei pawh hian hriat loh karin a pa hnung a lo zui reng chu niin kum 17 mi a nih laiin football a kalsan a, Cycling a luhchilh tak tak tan. A pa atanga a hriat bel sa, a boruakin a chenchilh reng a ni bawk a, Thirsakawr khalh a lo zeihawi hle a, Junior World Road leh Time Trial champion a ni ta thuai. Bul a tan that em vangin Cyclist ropui huangah a tel theih hial rinna lian tak a awm nghal.
Eng thilah pawh hian vanduaina leh chetsualna hi a lo awm tel ve vek mai a, Evenepoel ngei pawh hian a nuam a tih em em Thirsakawr khalh vangin nunna a chan teuh hle. Cycling-a a hun hmasa lam, Italian race: Il Lombardia-ah a tlansual vangin bang a su a. Bang a sut nat em vanga invawrhchhuakin luiah a tla lut hial nghe nghe. Hemi tuma a hliam vang hian a nunna chan teuh hle. Hun rei tak hnuah thachhuakin ngai a awh leh ta a, hlawhtlina sang zawk a chang zui ta zel a ni.
Khawvel a chhuahsan thelh hnuin Remco Evenepoel hi kum 2022 khan World Championship (Liege-Bastogne-Liege) ah a champion. Thirsakawr intlansiakna ngaihhlut hlawh ber Tour de France-ah pathumna niin, ‘Best Young Rider’ ah thlan a ni a, Olympic 2024 hmachhawn turin a tling zui ta bawk. Paris Olympic a lo thleng a, Thirsakawr intlansiakna chi khat; Time Trial-ah Gold Medal a la ta hial a ni.
Time Trial-ah hian Belgian an chetha a, Evenepoel pakhatna a nih bakah hian W. van Aert chu pathumna a ni bawk. He inelnaa Silver medal latu hi Italian F. Ganna a ni thung.