Paris khawpuia Olympic 2024 neih meka Tennis inelnaah player langsar Carlos Alcaraz leh Novak Djokovic te an chak zel a, quarter-final an lut. Djokovic hian quarter-final-ah Tsitsipas a hmachhawn zui leh dawn.
Olympic Gold Medal la la lo, Olympic Gold Medal lak tuma hma lam pan mek Novak Djokovic chuan nilai zan khan Germany tana inlan Dominik Koepfer a hmachhawn a, set hnih la zawnin quarter-final a inhlangkai. Olympic-a a hun hnuhnungah Djokovic hi mit la takin a inlan a, a elpui lian Rafael Nadal a vuak tlak hnuin Koepfer lakah 7-5 6-3 in hnehna a chang zui leh a, Medal la chiang turin vawi hnih chak a la mamawh.
Olympic-ah Bronze medal chiah la la Djokovic hian Greece aiawha inlan Stefanos Tsitsipas a hmachhawn zui leh dawn. Djokovic hmaa ding tur Tsitsipas hian last 16-a a khingpui Sebastian Baez chu 7-5, 6-1 in a hneh. Argentine Baez lakah awlsam taka chak Tsitsipas hian quarter-final-ah fiahna hautak zawk a hmachhawn a ngai dawn. Djokovic nen hian vawi 13 an inhmachhawn tawh a, Tsitsipas hian vawi hnih chiah hnehna a chang a, vawi 11 zet tlawm zawkah a tang.
Nilaini zana inkhel dangah tunlaia player tha ber Carlos Alcaraz chuan Roman Safiullin a hmachhawn a, awlsam taka hnehna changin quarter-final a lut. Alcaraz leh Nadal te inkawp; NadalCaraz ten USA aiawh Austin Krajicek leh Rajeev Ram te inkawp hneh lova double’n lama an tlak hnuin Alcaraz hian Safiullin chu 6-4, 6-2 in an hneh a, quarter-final a lut. Kum naupang te ni chunga Grand Slam-a hnuhma nei tha tak Alcaraz hian Olympic Gold Medal a la nghal thei a nih chuan Tennis-a a lal ram a tizau leh zual sauh ang.
Novak Djokovic leh Carlos Alcaraz bakah hian Olympic a Gold Medal la tawh, Alexander Zverev bakah Felix Auger-Aliassime, Lorenzo Musetti, Casper Ruud leh Tommy Paul ten quarter-final an lut ve bawk.
Mipa lamah player langsarte an tlang thup lai hian hmeichhe lama player langsar Iga Swiatek chuan quarter-final a lut ve bawk. French Open champion Swiatek hian last 16-a a khingpui Danielle Collins lakah 6-1 2-6 4-1 a hma a hruai lai mekin a khingpui hi a inhnukdawk a, awlsam takin hnehna a chang.
Swiatek chak lai hian Olympic atanga a tlak ruala Tennis chawlhsan nghal tur Angelique Kerber chu china nula Zhang Qinwen lakah 6-7 (4-7) 6-4 7-6 (8-6) in a tlawm a, Tennis-a a zinkawng a zawh tawp.