Euro 2024-ah an champion zawh loh hnuah Gareth Southgate a ban tak vangin England manager thar tur inrinsiakna boruak a hot nghal a, Three Lions manager thar ni tura rinkai zingah manager lar Pep Guardiola leh Thomas Tuchel te hming sawi rik a ni. England hian Southgate hmunruak luahtu tur an la ruat fel lo va, an manager thar ni tura rinkai hming hrang hrang lam rik a awm nual. England manager thar ni tura rinkai zualte tarlang ila.
- Lee Carsley
England Under 21 team enkawl mektu Lee Carsley hi Southgate hmunruak luah zo tura ngaih a ni. Kum 2023 khan England U-21 team hi European championship-ah a lo champion pui tawh a, hei vang hian England senior team enkawl tura duh a hlawh zual phah. An manager bang ta Southgate ngei pawh hian kum 2013 leh 2016 inkar khan England under-21 team a lo enkawl tawh a. Lee Carsley hian tha takin Southgate hnung a zui theih beisei a ni. Kum 50 mi Lee Carsley hi Republic of Ireland chuan an manager ni turin an dawr a, England U-21 team enkawl a thlang zawk tlat thung. FA hian hun rei tak daih contract an ziahpui kher lo a nih pawhin an manager atan an rawih rinna lian tak a awm.
- Pep Guardiola
Tunlaia manager tha bera ngaih Pep Guardiola hi England tantute chuan an manager thar atan an awt hle. Barcelona leh Bayern Munich te hlawhtling taka lo enkawl tawh a, ropuina rama Manchester City hruai thleng lehtu Guardiola hian City-ah kum 2025 thleng chauh contract a nei tawh a. A contract hman zawh phawt a duh a nih pawhin FA hian lawm taka nghah an thlan a rinawm. England hian player lar tak tak an nei teuh a, Pep Guardiola-a’n a enkawl a nih ngat chuan inelna lianah an champion theih ngei an inting. An buaina ber chu Pep hian England senior team a enkawl duh ang em..tih hi a ni.
- Eddie Howe
AFC Bournemouth a chetthat pui vangin FA chuan Eddie Howe hi an manager ni turin tunhma lam khan an lo dawr daih tawh a, an dawr hlawhtling lo. Bournemouth a chetthatpui hnuin Newcastle United a chetthatpoui leh viau a, Champions League khel turin a tlinpui hial nghe nghe. Hei vang hian FA chuan Howe hi an manager thar atan an awt leh zual.
Kum 46 mi Eddie Howe hian St James Park-ah kum 2027 thleng cham turin contract a la nei a. Newcastle-ah conract sei tak a la nei hian FA ngaihtuahna a tibuai dawn thung. An manager atan an ruai dawn a nih chuan zangnadawmnaah sum hlawm an thehchhuah ngei a tul ang.
- Jurgen Klopp
Liverpool manager hlui Jurgen Klopp hian team enkawl a nei lo mek a, England tan hmin awlsam lai a ni mai thei. Klopp hian Liverpool a chhuahsan hnuin sawmtu a nei neuh neuh a, USA in an manager ni tura an sawmna a hnar a. Germany in an manager thar ni turin awt viau mah se an la hmin thei lo bawk. Team enkawl nei lova hahdam rih a duh a, amah sawmtute a la hnar zel rih. England in an sawm a nih chuan ngaihtuahna thar a neih ngei rin a ni a. Klopp an ruai thei a nih chuan England pawhin hma an sawnpui ngei a rinawm hle.
- Mauricio Pochettino
Tottenham leh Chelsea enkawl tawhtu Argentine manager Pochettino hi FA in an manager thar ni tura an duh hming langsar zingah a tel. PSG manager hlui Pochettino hian England senior team enkawl a lo chak tawh thin a, FA in an sawm a nih ngat chuan sawm harsa lo viau tura ngaih a ni.
- Graham Potter
Chelsea in thla sarih hnu lekah ban bawk mah se Brighton a chetthatpui vangin FA chuan Graham Potter hi an manager thar atan an la awt reng. EPL a hming chher tawh Potter hian Sweden sawmna a lo hnar tawh a, national team enkawl a chak lova ngaih a ni. Sweden a hnar rual hian Ajax leh Leicester te sawmna a hnar tho bawk. Sweden lo hnar tawh mah se England national team enkawl erawh a hreh lo tura ngaih a ni.
- Thomas Tuchel
Chelsea manager hlui Thomas Tuchel hian Chelsea bakah club lian dang Bayern Munich, Paris St-Germain leh Borussia Dortmund te a lo enkawl tawh a, manager fing tia hriat lar a ni. FA in an manager thar ni tura an duh zual zingah a tel a. England team a enkawl a nih chuan hmasawnna a thlen ngeiin a rinawm.