August 7, Ningani khan RG Stadium, Mualpuiah GIG Motors I Day Football Tournament 2024 khelh chhunzawm a ni a, Aizawl FC leh Mizoram Police FC ten hnehna an chang. Inelna neih meka khel tha tak Aizawl FC hian an khingpui FC Bethlehem an hneh a. MPL champion Mizoram Police FC in North East United FC rawltharte chu Michael Lalbiaksanga goal thun hmangin an hneh ve bawk.
Season kal meka inelna liam Mizoram Premier League (MPL) leh I Day tournament-a khel tha tak Aizawl FC hian inelna liana chak harsat FC Bethlehem an hmachhawn a, 4-0 ngawtin an sawp. AFC hian ISL team North East United reserve team chu 4-0 in an lo sawp tawh a, an match hnuhnung pahnihah goal riat thunin goal chhuah an nei lo.
Team lian Aizawl FC leh MPL team thar FC Bethlehem te hian inhnehtawk takin bul an tan a, inkhel hmuhnawm takah goal lut a awm lawk thei lo. Beisei anga goal a luh theih lawk loh hnuin chawlhlawk dawn hnaihah AFC an che fuh a, minute 41-naah Lalbiakdika hmangin hmahruaina goal a thun. Chawlhlawk hmain goal dang a luh belh thei lova, si khat faia hmahruai chungin AFC hian chawlhlawk an hmang.
Chawlhlawk hnu lamah Aizawl FC an khel tha leh zual a, goal an thun belh leh thuai. Second half tan atanga minute khatna lekah goal hmahruai thuntu Lalbiakdika chuan an goal hnihna a thun a, an hmahruaina a tizau. FC Bethlehem laka goal hnih thun Lalbiakdika hi ‘Man of the match’ ah thlan a ni.
Lalbiakdika’n an goal hnihna a thun atanga minute 10 hnu lekah AFC in goal an thun belh leh a, Augustine Lalrochana chuan minute 56-naah an goal thumna a thun a. Goal lut a awm belh theih loh vang vang hnuin RH Laltlanhlua chuan hun pek belh minute 90+3-naah an goal lina a thun belh zui leh a, an chakna nemnghetin a tawp a khar. Aizawl FC hian si li fai ngawtin hnehna an chang a, point thum an hmuh belh leh ta a ni.
- NEU FC an tlawm nawn leh
I Day inelna hmachhawn tura sawm North East United FC rawltharte an talbuai chhunzawm a, Aizawl FC lakah si li fai ngawta an tlawm hnuin Mizoram Police FC hneh lovin an tlawm zui leh.
ISL team North East United FC hian Mizorama inelna hmachhawn turin an player thate an rawn tir lova, an rawlthar team enchhin nan an hmang. NEU FC rawlthar team te hian I League team Aizawl FC hmachhawnin bul an tan a, an mualpho nghal. An match hnihnaah insiamthat ngei tumin tan an khawh a, an game-ah hmasawnna lian tak a awm naa tlawm erawh an pumpelh thei lo thung. MPL champion Mizoram Police FC nen hia an inhnehtawk hle a, minute 90 chhungin goal thun thei an awm lo. Hun rei tak chhung goal lut a awm theih loh hnuin hun pek belh minute 90+2-ah Michael Lalbiaksanga chuan MPFC tan chakna goal a thun a, hnehna hlu tak an chang zui ta a ni.