- Rinfela Zadeng
Mizoram Presbyterian Kohhran chuan ni 7 – 8 September 2024 hian Pastor Bial Naupang Sunday Sikul Inkhawmpui a nei leh dawn a. Tun hnaiah maiah hian naupang châng sawi rual lai video hlimawm tak pawh Social Media lamah a lo darh tih kan hmu awm e.
- Naupang Sunday Sikul Inkhawmpui Tobul
Naupang Sunday Sikul Inkhawmpui hi a tirah chuan Missionary-te thahnemngaihna avanga neih tan a ni a. Kum 1931 khan Aizawl Tlangnuam Kohhranah neih a ni a, hei hi Naupang Inkhawmpui hmasa ber ni-a hriat a ni. Tun hma lam chuan Naupang Inkhawmpui hi Bial hrang hrangin an remchan hunah an nei mai thin a, tun hnai deuh atang khan Bial tinte an kalrual theih nan MSSU chuan Sunday School Zirlai Syllabus-ah Naupang leh Senior Inkhawmpui hun tur an ruahman tel ve ta a ni. September Pathianni vawi hnihnaah Beginner atanga Sacrament Department inkarte inkhawmpui hun hi hman a ni a, September Pathianni vawi 3 – naah Senior Department-in Inkhawmpui an nei bawk thin.
- Pathian thu kan hriatna bul – naupan lai
|umkhat chu kan û pakhat hian – a fanu, damlohna avanga mi ang pha zân lo hi an Sunday Sikul Zirtirtu te’n intihsiaknaa tel ve an phal loh thu an hrilh a. ‘Mi rualin a sawi ve thiam si lo a, tel ve lo mai se’ tih lam hawiin a nu chu an hrilh a, a rilru a nat thu a sawi. Nu pakhat chuan a fa chu a harh em avangin a inthlahrung a, Inkhawmpuina tur atana thu an zirnaah leh Inkhawmpuiah pawh a tel tir ngam lo a, zirtirtute hmai a zah thu a sawi.
Zirtirtute hi dem nghal ngawt tur chu an ni hauh lo a; mahse Naupang Inkhawmpui kan neih chhan hi kan hriatchian a tul ta hle. Fiamthu thawhna tur atan te, mi nuih tiza tur atan te leh pakhatna nih tuma inelna/competition a ni lo a. Pathian thu kan hriata kan lo thanlenpui zelna tur atana Naupang Inkhawmpui hi buatsaih a ni.
Naupang rilru thianghlim em em te hian an thil sawi hi a nuihzatthlak tih an hre lo a, fiamthu an thawh hek lo. An theihtawpin an thu zir – Pathian thu an sawi a ni. Chuvangin, an lo sawi rual lo emaw a lo nuihzatthlak ta deuh a nih pawhin a tha vek. A pawimawh ber chu Pathian thu an hriat belh a ni. Pakhatna nih tum lutuk avanga naupang thiam thei lo leh mi ang pha zân lo te leh harh em em te hnawlna tura Inkhawmpui a ni lo tih hi i hre nawn ang u.
- Indoctrinate – thurin zirtir
Pathian awm ring lo te sawi zin tak pakhat chu – Pathian kan rinna leh Pathian a awm kan rinna hi naupang kan nih laia kan inzirtir vang a ni – an ti fo thin. An thlirna atangin leh mihring chanchin zirna tarmit atang chuan a nihna chen te pawh a awm ang. Mahse finna leh hriatna kan neih te hi naupang kan nih lai atanga kan hriat chhoh vek a ni a. Tin, Pathian nihna (concept) kan hriat tak tak hma atang tawhin kan pianpui hriatna (innates idea/knowledge) atang tawhin mihring pangngai chuan tu emaw keini aia thil tithei, mi siamtu tu emaw hi kan ngaihtuah a. Tu emaw va biak (worship) tur kan zawng tih hi chu mihring chanchin kan zir atang pawhin chiang takin kan hre vek awm e.
Chuvangin Pathian thu, Pathian inpuanna Bible kaltlanga kan tu leh fate kaihhruaia an rilrua Pathian thu tuh leh zirtir hi kan mawhphurhna a ni a. Chumi atana pawimawh ber chu Naupang Sunday Sikul Inkhawmpui leh Sunday Sikul kai hi a ni. Chu chu Missionary te pawh khan an lo hrechiang em em a, Sunday Sikul Inkhawmpui leh Sunday Sikul hi an lo buatsaih vat a ni tih a lang chiang hle.
- Inelna thianglim leh naupang zawng zawng tan
Inelna rilru hi a tirah tha viau mahse a tawpah chuan mahni hmasialna leh a ber nih duhna rilru kan pu ngei ngei zel a; chu chu inelna awmze dik tak zawk pawh a ni ang. Chutih rualin Naupang Sunday Sikul Inkhawmpui te erawh hi chu pakhatna nih tum ngar ngar emaw mi dang te elna leh erna, a thiam lo te tel ve phal lohna tur enaw atana Kohhran hian a buatsaih a nih a rinawm loh a. A tira kan sawi tawh angin Pathian thu kan hriatna leh kan inzirtirna tir atan, nghet taka kan vawna kan dam chhunga Pathian thu kan awih theihna tur atana buatsaih a ni a. Chuvangin Sunday Sikul Zirtirtu te leh Inkhawmpui buatsaih tute hian kan hriatchian nawn a tul hle.
A duh apiang te lo tel se la, naupang rilru thianghlim tak te’n rual lo tak leh tawng fiah mang loa Pathian thu an sawi te hi a hlutzia hria ila, i huapzo ang u. Heng naupangte hian an theihtawp an chhuah a, an thiam dan ang angin Pathian thu an zir a, an sawi a ni tih hi hre rengin, pakhatna leh a tha ber nih duh luat vanga inelna rilru hrisel lo pu khawpa tan ulh awm thei lakah i fimkhur ang u. A thiam te chuan tha tak leh zahawm takin an thu zirte an sawi ang a; a thiam tha lo leh sawi rual thiam lo, tawng fiah lo taka sawi te pawhin lo sawi ve zel rawh se.
A tul chuan kan nui dur dur ang a; van atangin a chanchin – rilru thianghlim taka sawia a nuihzatthlak tih hre hauh loa sawitu naupangte chungah hian Pathian pawh hi a lawmin hlim takin a lo nui ve ngei ang.