September 4, Nilaini khan LZ Juice MPL 11 khelh chhunzawm niin round 9-na khelh tan a ni. Round 9-naa inkhel hmuhnawm takah hmahruaitu Chanamari FC leh pahnihnaa awm mek Aizawl FC te an inhnehtawk. CFC leh AFC te hi MPL 11-ah vawi hnih an inhmachhawnna a ni a, an la inhnehtawk ve ve. Nilainia inkhel dangah Ramhlun Athletic FC leh Sihphir Venghlun FC
te an inhnehtawk ve bawk.
- An tlawm duh lo
Nilaini ah RG Stadium-a inkhel hnuhnung zawkah season kal meka tlawm la nei lo ve ve Chanmari FC leh Aizawl FC te an inhmachhawn a, 1-1 a inhnehtawkin an la tlawm duh lo ve ve. Khelh 9 an khelh tawh atanga tlawm la nei lo pahnih CFC le AFC te inkarah hian point hnih a tlazep chhunzawm zel.
MPL 11-ah an elpui lian Aizawl FC lakah Chanmari FC an khel tha viau a, goal pawh an thun thuai. Inkhel tan atanga minute 17-naah Moses Lalrinzuala chuan hmahruaina goal a thun. Hma takah goal an thun vangin inrintawkna sang zawk an nei a, an elpui lian Aizawl FC lakah point thum hmuh ngei tumin tan an khawh. Moses-a goal thun hmangin hma an hruai reng a, chungnung zawk ni chungin chawlhlawk an hmang.
Chawlhlawk hmain an si phurh sut thei lo mah se chawlhlawk hnu lamah Aizawl FC in bul an tan tha a, goal an thun thuai. Second half tan atanga minute hnihna lekah Laltlanzova chuan goal thunin an si phurh a sut. Goal khat ve an thun hnuin inkhel a hmuhnawm zui viau a, goal thun belh tumin an innawr tawn nasa viau bawk. Inkhel hmuhnawm takah goal dang a luh belh thei tawh lo va, table chunga awm pahnih; Chanmari FC leh Aizawl FC te chu 1-1 in an inhnehtawk a, point khat ve ve an hmu. He inkhel hmuhnawm takah hian Chanmari FC tana khel tha tak RS Lallawmzuala chu Kuriz Man of the Match:-ah thlan a ni.
Aizawl FC nen an inhnehtawk leh tak vangin Chanmari FC hian khelh 9 atangin point 23 an hmu a, hma an hruai chhunzawm zel. Chanmari FC hnuaiah hian point 21 hmuin Aizawl FC an awm zui zel bawk. Table chung luahtu pahnih CFC leh AFC te hi pathumnaa awm mek Mizoram Police FC lakah point 10 chuangin an sang fal mek a, semi-final lut turin an dinhmun a tha viau tawh.
- SVFC in tlawm an pumpelh
Nilainia inkhel hmasa zawkah Ramhlun Athletic FC leh Sihphir Venghlun FC an inhmachhawn a, inkhel hmuhnawm takah Sihphir Venghlun FC in tlawm an pumpelh thei hram a, point khat hlu tak an hmu.
Khelh riat atanga point 9 ve ve hmu mek Ramhlun Athletic FC leh Sihphir Venghlun FC te hian inkhel hmuhnawm an lantir a, goal hnih ve ve an thun. RAFC in SVFC lakah bul an tan tha a, Benjamin Lalnunpuia goal hnih thun hmangin hma an hruai reng. Hun rei tak chhung hnufual zawk an nih hnuin hun tawp dawn hnaiah SVFC an che fuh a, goal hnih thunin an si phurh an sut. SVFC tan hian Lalawmpuia chuan minute 81-naah goal thunin an si phurh a sut then. Hun pek belh minute 90+1-ah Seilenlal chuan goal thunin an si phurh a sut zo va, tlawm an pumpelh.
Ramhlun Athletic FC lakah tlawm an pumpelh vangin Sihphir Venghlun FC hian khelh 9 atangin point 10 an hmu a, palina an luah chhunzawm theih phah.