MNF Party chuan nimin khan thuchhuah siamin, Samagra zirtirtuten thla 3 lai mai hlawh an la thei lo hi a pawi kan ti hle a. Zirtirtu rim taka zirtir hnathawkten hei chen chen an thawhhlawh an la thei lo leh, Teachers Day hial boycott an tum hi a pawiin a lungchhiatthlak kan ti hle a ni, an ti.
Hetiang harsatna a lo thlen chhan hi Mizoram sorkarin a tih tur a tih loh vang a ni tih hi kan puang a. Education Minister zahawm takin thla 5 chhung Central-in kan sum dawn tur min pek loh vang tih a sawi hi a dik a. Thla 5 chhung Central-in kan sum dawn tur min pek loh chhan hi Mizoram sorkar-in a tih ve tur thla 5 chhung a tih loh vang a ni. Mizoram sorkar-in Teachers Education Allocation leh thil dang ṭul tih tur ang a tih fel har avangin zirtirtute hian hlawh la thei lo a ni. Sorkar inthlahdah vang leh dapchawp lutuka an kal vang liau liaua zirtirtute tawrhna lo thleng hi a pawi kan ti hle, tia an thuchhuahah chuan tarlangin.
Education Minister hian mawhpuh tur zawng buai lo hian, a inthlahdah vang leh a hna a tlin loh vang a ni tih hi pawm se la, rang taka Samagra zirtirtuten hlawh an lak theih nan hma la nghal rawh se, an ti a.
ZPM sorkar hian harsatna a awm hlek a sorkar hmasa emaw tute emaw puhmawh tur an zawng ruai ṭhin hi a pawi hle a. Hetiang sorkar mawhphurhna la ngam lo, insawithiamna tur leh puhmawh tur ringawt zawng kan hrawn hi a vanduaithlak hle a ni, an ti bawk.